Në orët e para të mëngjesit të sotëm në Itali, në kilometrin e 12-të të rrugës Cassibile-Floridia, ka ndodhur një aksident i rëndë ku ka mbetur i vdekur trajneri i skuadrës së Sirakuzës, Davide Artale, ndërsa portieri Maurice Gormis mbeti i plagosur.
Mediat italiane shkruajnë se makina e cila drejtohej nga Artale u përplas me një mur dhe u rrotullua disa herë duke e lënë të vdekur trajnerin. Ndërsa mësohet se portieri ka pësuar dëmtime në kokë dhe një plagë në qafë.
Për këtë ngjarje të rëndë ka reaguar edhe presidenti i skuadrës së Sirakuzës, i cili i ka shprehur ngushëllimet familjes së trajnerit Artales.
Ndërkohë policia italiane po vijon hetimet për të zbardhur shkakun e aksidentit.
