Çdo ditë e më shumë autoritetet greke po lajmërojnë shtimin e bilancit tragjik të njerëzve që humbën jetën nga zjarri masiv në rajonin e Atikës në Greqi.
Numri i të vdekurve ka shkuar në 83 ndërsa mësohet se 187 persona janë plagosur. Ngjarja bëhet edhe më tragjike, pasi 24 prej viktimave janë fëmijë. Ndërkohë dyshohet për qindra persona të zhdukur.
Deri më tani nuk ka asnjë konfirmim zyrtar nëse ka shqiptarë mes viktimave, ndërsa dy shqiptarë rezultojnë të humbur.
Përgjatë ditës së hënë edhe gjatë natës, duke u zbardhur e marta, në tri zona të ndryshme të Athinës ‘shpërthyen’ 15 vatra zjarri, ku situata më dramatike ishte në fshatin bregdetar Mati.
Përveç dhjetëra të vdekurve në vende të ndryshme të periferisë së Athinës për shkak të zjarreve masive, ekipet e shpëtimit u tmerruan kur gjetën 26 persona të djegur të gjallë në një restorant, kjo edhe për shkak të bombolave të gazit. Aktualisht në terren ndodhen forca të ndërhyrjes, të cilët po vijojnë kërkimet në çdo ndërtesë.
Ndërkohë, deri tani janë tre shqiptarë në spital, një grua shqiptare, që është shtruar në spitalin Evangelismos, si dhe dy fëmijë të mitur, (edhe ata shqiptare) 10 dhe 13 vjeç, që janë shtruar në spitalin pediatrik Agia Sofia, në gjendje të mirë shëndetësore.
