Gjykata ka dhënë masën “arrest me burg” për Bernard Toçin, vëllai i Bledar Toçit, i cili vrau Dritan Haxhollin në Kavajë.
Bernard Toçi u arrestua pak ditë më parë pasi policia i gjeti në banesë 7 doza kokainë.
Prokuroria kërkoi caktimin e masës së sigurisë “arrest me burg”, ndërsa kjo kërkesë është pranuar nga gjykata.
Nga ana tjetër, prokurori shprehet se dyshohet se lënda narkotike e gjetur në banesën e Marsida Qatjas, ku ndodhi ngjarja e rëndë është sjellë nga Bernard Toçi.
“Ai akuzohet për veprën penale “prodhim dhe shitje të lëndëve narkotike. Të caktohet masa e sigurisë “arrest me burg”.
Por, avokati i Toçit shprehet se arrestimi i tij është i paligjshëm pasi i ati i Berndardit ka pranuar se e ka sjellë ai drogën në shtëpi pasi e përdor si qetësues.
“Arrestimi i Bernard Toçit është i paligjshëm. Ai nuk ka lidhje me ngjarjen. Kush është arsyeja që ai është arrestuar për drogën. Në shtëpinë e tij jetojnë katër persona, pse duhet të jetë ai posedues i drogës. Në këto rrethana arresti është i paligjshëm. I ati i Bernardit ka pohuar se lënda është sjellë nga ai në banesë e jo nga Bernardi. I ati i Bernardit ka pohuar se e përdorë kokainën si efekt qetësuas pasi është i sëmurë”, ka thënë avokati.
Ndërsa Bernard Toçi ka preferuar që të mos japë asnjë deklaratë.
