16-vjeçarja Merita Tola, e cila u asfiksua në shtëpinë e saj në Ostren, bashkë me të ëmën, motrën dhe vëllain, ka dalë jashtë rrezikut për jetën.
Vajza është transferuar nga Spitali i Traumës për në QSUT dhe do t’i nënshtrohet kontrollit psikologjik para se të shkojë në Bulqizë.
Ngjarja ndodhi të premten, në Ostren, ku si pasojë e asfiksisë nga tymi i përhapur nga soba me dru, nëna me dy fëmijët e saj humbën jetën.
Rajmonda Tola, 45 vjeç, u gjet e pajetë në banesën e saj bashkë me djalin, Fatjonin, 14 vjeç dhe vajzën, Rudinën 22 vjeç, ndërsa vajza tjetër 16-vjeçarja Merita Tola, u gjet me shenja jete dhe arriti të mbijetonte.
Rudina Tolaj kishte prerë ditën e dasmës dhe martohej më 10 shtator të këtij viti. Xhaxhai i saj është shprehur se e reja kishte caktuar datën dhe familjarët e kanë veshur si nuse për ta përcjellë për në banesën e fundit.
“Rudina e kishte prerë datën. Martohej në 10 shtator. Sot e kemi bërë nuse, e kemi nxjerrë nuse”, tha ai për mbesën e ndjerë sipas “Dosja.al”.
