Shtyhet sërish gjyqi për Jonada Avdian, e cila humbi jetën një vit më parë në Potam, pasi e përplasi me skaf ish-efektivi i policisë Arjan Tase.
Gjyshi i 7-vjeçares ka deklaruar se kanë pasur shpresa te drejtësia, por pas kësaj seance, deklaron se “diçka po luhet”.
“Kemi pasur shpresë te drejtësia. Dyshojmë se diçka po luhet nga segmente të pushtetit. Që nga 10 korriku ndërrohen prokurorët, kemi dyshim se drejtësia mban erë. Duam drejtësi nga gjykatat shqiptare, që kjo ngjarje të mos përsëritet. Çështja po rrëshqet në honet e llumit të drejtësisë”, tha gjyshi i vogëlushes.
7-vjeçarja humbi jetën tragjikisht në plazhin Potam të Himarës teksa po lahej në det, pasi u godit nga një gomone, e cila në kundërshti me rregulluat, po lundronte brenda kordonit të sigurisë.
Në 11 korrik 2023 Prokuroria e Vlorës ka mbyllur hetimet dhe mori zyrtarisht të pandehur ish-efektivin, që tashmë do të përballet me drejtësinë për akuzën e vrasjes me dashje në mënyrë indirekte.
