Arjan Tase, ish-efektivi i Policisë i cili 2 vite më parë përplasi për vdekje me skaf 7-vjeçaren Jonada Avdiaj në plazhin e Potamit, është dënuar me 18 vite burg nga Gjykata e Vlorës këtë të mërkurë. (lexo këtu)
Ngjarja e rëndë ka ndodhur më 2 gusht 2022. 7-vjeçarja humbi jetën tragjikisht në plazhin Potam të Himarës teksa po lahej në det, pasi u godit nga një gomone, e cila në kundërshti me rregulluat, po lundronte brenda kordonit të sigurisë.
E mitura u përplas fillimisht nga pjesa përballë e gomones dhe më pas trupi i saj është prerë nga helikat duke ndërruar jetë në vend.
Kjo ngjarje tronditëse solli reagime nga gjithë opinioni publik, ndërsa u organizuan edhe protesta për disa ditë me radhë.
Tragjedia solli edhe reagimin e Policisë e cila bllokoi të gjitha mjetet lundruese pothuajse në të gjithë vijën bregdetare dhe iu nënshtruan një kontrolli.
Incidente të tilla tragjike dëshmojnë se papërgjegjshmëria e autoriteteve po kalon çdo kufi.
Sakaq ende nuk shohim asnjë shenjë reflektimi nga ana e tyre. Në një vështrim të bërë së fundmi në bregdetin shqiptar që mbledh mijëra vizitorë çdo vit, shihet qartë mungesa e masave për sigurinë e tyre.
