Të paktën 15 persona kanë humbur jetën pasi vagoni i teleferikut Gloria në Lisbonë doli nga shinat dhe u rrëzua, tha një zëdhënës i shërbimit mjekësor të urgjencës. Autoritetet nuk i identifikuan viktimat dhe as nuk zbuluan kombësitë e tyre, por thanë se midis të vdekurve ishin disa shtetas të huaj. Të paktën 18 persona u plagosën gjithashtu.
“Është një ditë tragjike për qytetin tonë… Lisbona është në zi, është një incident tragjik, tragjik”, u tha gazetarëve Carlos Moedas, kryebashkiaku i kryeqytetit portugez.
Pamjet nga vendi i ngjarjes treguan teleferikun e ngjashëm me tramvaj, i cili transportonte njerëz lart e poshtë një kodre në kryeqytetin portugez, të shkatërruar dhe punonjësit e emergjencës duke nxjerrë njerëz nga rrënojat. Në një deklaratë, presidenti, Marcelo Rebelo de Sousa, shprehu keqardhje për aksidentin dhe shprehu shpresën se autoritetet do të përcaktojnë së shpejti shkakun e përplasjes.
Linja, e cila u hap në vitin 1885, lidh qendrën e qytetit të Lisbonës pranë Sheshit Restauradores me Bairro Alto (Lagjen e Sipërme), e njohur për jetën e saj të gjallë të natës.
Dy vagonët e saj janë të bashkangjitur në skajet e kundërta të një kablli transporti me tërheqje të siguruar nga motorët elektrikë në vagona.
CNN Portugal tha se pasagjerëve iu desh të hidheshin nga dritaret e saj kur ndodhi incidenti.
