Një ngjarje e rëndë ka tronditur familjen e këngëtares së njohur italiane Laura Pausini.
Xhaxhai i saj, Ettore Pausini, ka humbur jetën tragjikisht pas një aksidenti rrugor që ndodhi në periferi të Bolonjës, në Itali. 78-vjeçari, një çiklist i pasionuar, u përplas për vdekje nga një automjet që më pas u largua me shpejtësi nga vendngjarja, duke e lënë pa ndihmë.
Sipas mediave italiane, ngjarja ndodhi në Via degli Stradelli Guelfi, në zonën midis Castenaso dhe San Lazzaro di Savena, ku viktima po kthehej në shtëpi pas një udhëtimi të zakonshëm me biçikletë. Ai u godit ballë për ballë nga një Opel Astra e vjetër, ngjyrë të çelët, ndërsa shoferi ende nuk është identifikuar. Ekipet e emergjencës mbërritën menjëherë, por përplasja rezultoi fatale dhe përpjekjet për ta shpëtuar ishin të kota.
Janë duke u analizuar pamjet e kamerave të sigurisë përgjatë segmentit rrugor për të gjetur targën dhe drejtuesin e mjetit. Dëshmitarë në vendngjarje kanë treguar se makina nuk ndaloi për të dhënë ndihmë, gjë që ka shtuar indinjatën e banorëve lokalë. Banorët e zonës e kanë cilësuar atë segment si “të rrezikshëm për biçiklistët”, duke kërkuar prej kohësh masa shtesë sigurie për të shmangur incidente të tilla tragjike.
Ettore Pausini ishte një person i respektuar e i dashur në komunitetin e tij. Për më shumë se 30 vite kishte punuar si berber në Piazza Azzarita, i njohur për qetësinë dhe përkushtimin ndaj punës. Pas një beteje të suksesshme me kancerin, ai ishte bërë pjesë e shoqatës Onconauti, e cila ndihmon pacientët onkologjikë në procesin e rehabilitimit dhe rikthimit në jetën aktive.
Në vitin 2016, Laura Pausini e kishte përmendur publikisht xhaxhain e saj në një postim në rrjetet sociale, duke e quajtur “një kampion të vërtetë” për forcën dhe shpirtin e tij luftarak.
Lajmi për vdekjen e tij ka prekur thellë komunitetin e Solarolos dhe Bolonjës, ku qindra njerëz kanë shprehur ngushëllime dhe solidaritet me familjen Pausini. Megjithëse këngëtarja ende nuk ka reaguar publikisht, rrjetet sociale janë mbushur me mesazhe mbështetjeje për të dhe familjarët e saj, të cilët po përballen me një humbje të madhe.
