Një ngjarje e rëndë në malin më të lartë të Austrisë, Grossglockner, ka përfunduar me akuzë penale ndaj partnerit të një alpinisteje 33-vjeçare, e cila humbi jetën nga ngrirja ekstreme në janar të këtij viti. Hetimet e prokurorisë kanë përfunduar dhe rezultojnë se i dashuri i saj, një alpinist 36-vjeçar me përvojë, po përballet tani me akuzën e vrasjes së paqëllimshme për shkak të neglizhencës së rëndë.
Çfarë ndodhi në malin 3,400 metra të lartë?
Çifti u nis për një turne alpin drejt majës së Grossglockner, por vetëm 50 metra larg majës, gruaja filloi të shfaqte shenja rraskapitjeje dhe nuk ishte në gjendje të vazhdonte ngjitjen. Sipas raportimeve të Heute, partneri i saj vendosi ta linte vetëm për 6.5 orë, ndërsa ai shkoi të kërkonte ndihmë.
Gjatë këtij intervali, temperaturat ekstreme dhe era e fortë i morën jetën 33-vjeçares. Ajo u gjet e ngrirë nga ekipet e shpëtimit të nesërmen në mëngjes.
“Rreth orës 2 të mëngjesit, i pandehuri e la të dashurën e tij të pambrojtur, hipotermike dhe të çorientuar rreth 50 metra poshtë kryqit të majës së Großglockner… Gruaja ngriu për vdekje.”
Sipas prokurorisë, duke qenë se ai kishte shumë më tepër përvojë në alpinizëm dhe kishte planifikuar ngjitjen, ai konsiderohej praktikisht si guidë e turit, me përgjegjësi të plotë për sigurinë e saj.
Pas analizës së raporteve mjeko-ligjore, telefonave, orëve sportive, videove dhe dëshmive teknike, akuzat ndaj tij përfshijnë:
- e kishte nisur turneun dy orë me vonesë, duke e ekspozuar çiftin ndaj kushteve të rënda gjatë natës;
- nuk kishte marrë me vete pajisje të mjaftueshme emergjence, përfshirë batanije shpëtimi dhe thes bivaku;
- e kishte lënë të dashurën në një zonë të pambrojtur nga era, ndonëse temperaturat reale me erën arrinin në –20°C;
- i kishte lejuar të ngjitej me splitboard dhe çizme të buta bore, pajisje të konsideruara të papërshtatshme për një turne alpin në terren të përzier;
- nuk kishte bërë një telefonatë emergjente para rënies së natës;
- nuk kishte dërguar as sinjale rreziku, edhe pse një helikopter policie fluturoi mbi të në orën 22:50;
Vetëm në orën 3:30 të mëngjesit, ai kontaktoi shërbimet e emergjencës, rreth shtatë orë pasi e kishte lënë të dashurën vetëm. Kushtet e motit e bënë të pamundur ngritjen e një helikopteri në agim, dhe ekipet e shpëtimit mbërritën tek viktima pas orës 10:00, ku konstatuan se ajo kishte ndërruar jetë.
36-vjeçari po përballet tani me akuza të rënda për shkak të neglizhencës së tij, dhe nëse shpallet fajtor, mund të dënohet deri në tre vite burg. Ngjarja ka shkaktuar debat të gjerë në Austri për sigurinë në male, përgjegjësinë e guidave dhe rreziqet e marrjes së alpinistëve të papërvojë në lartësi ekstreme.
