Arkitekti kinez Kongjian Yu, i njohur në të gjithë botën si “babai” i “qytetit sfungjer”, është vrarë në një aksident ajror në Brazil së bashku me tre persona të tjerë në bord.
Kongjian Yu, 62 vjeç, ishte një pikë referimi për zhvillimin e qëndrueshëm urban. Koncepti i “qytetit sfungjer” kishte si “thelb” zëvendësimin e sipërfaqeve të qytetit me materiale poroze dhe hapësira të gjelbra, për të thithur më mirë ujin në tokë dhe për t’u përballur më mirë me rreziqet e përmbytjeve.
Tre viktimat e tjera, sipas ÁPE-MPE, ishin regjisorët brazilianë Luis Fernando Feres da Cunha Ferras dhe Rubens Crispim Jr., regjisorë dhe producentë dokumentarësh, si dhe piloti dhe pronari i aeroplanit. Shkaqet e aksidentit, i cili ndodhi të martën në mbrëmje në një zonë rurale të Pantanalit, një ligatinë e gjerë në Amazonën jugore, në shtetin Mato Grosso do Sul (Brazili qendror-perëndimor), nuk janë përcaktuar ende, sipas policisë.
Kongjian Yu mbërriti në Brazil në fillim të shtatorit për të marrë pjesë në Bienalen e Artit Bashkëkohor të São Paulo dhe po udhëtonte për në Pantanal për të xhiruar një dokumentar me dy regjisorët. “Koncepti i tij i ‘qyteteve sfungjer’ u zbatua në më shumë se 1,000 projekte në 250 qytete”, shtoi CAU, duke nënvizuar se arkitekti “mbrojti zgjidhje të bazuara në natyrë për të adresuar përmbytjet urbane dhe ndikimet e krizës klimatike”.
Yu ishte pjesë e programit të Bienales Ndërkombëtare të Arkitekturës në São Paulo javën e kaluar. Sipas gazetës Estadao, profesori kinez më pas iu bashkua një udhëtimi me regjisorë që po xhironin një dokumentar rreth punës së tij.
Yu fitoi famë globale si arkitekt dhe planifikues urban kur qeveria kineze miratoi konceptin e tij të ” qyteteve sfungjer “, duke përdorur zgjidhje të bazuara në natyrë për të thithur dhe mbajtur ujin, në vend të infrastrukturës së betonit që e largon atë. Ideja e tij është miratuar që atëherë në qindra vende në Kinë, si dhe në zona urbane nga Shtetet e Bashkuara në Rusi.
