Televizioni “Top Channel” është detyruar t’i paguajë kompanisë së njohur “New Vision”, që merret me ndërtimin e studiove, 470 milionë lekë. Kompania ka fituar në rrugë gjyqësore të drejtën e saj për të marrë pagesën mbi punimet e kryera.
“Gjykata e Tiranës, më datë 30.05.2018, ka miratuar kërkesën për lëshimin e urdhrit të ekzekutimit, që do të thotë se detyron kompaninë “Top Channel” që nëpërmjet një përmbaruesi gjyqësor të paguajë detyrimet ndaj “New Vision”, shkruan “Bold News”.
Vjollca Hoxha, në cilësinë e administratores së “Top Channel”, e kundërshtoi urdhrin e ekzekutimit, si edhe kërkoi gjykimin në themel të çështjes.
Gjykata e Tiranës pranoi kërkesën për pezullimin e urdhrit të ekzekutimit, duke i hequr të drejtën, përkohësisht, subjektit “New Vision” që të merrte paratë, deri në përfundimin e gjykimit të çështjes në themel.
Subjekti “New Vision” e ankimoi në Gjykatën e Apelit vendimin për pezullimin e urdhrit të ekzekutimit. Kështu në seancën gjyqësore të mbajtur në datën 29 tetor 2018 u rrëzua pezullimi i urdhrit të ekzekutimit dhe kompania fitoi të drejtën për të marrë shumën 470 milionë lekë që ia ka borxh televizioni.
/Bold News
