Stilisti i famshëm amerikan Tommy Hilfiger, një nga figurat më me ndikim të modës globale, ka ndarë së fundmi filozofinë e tij të suksesit në podkastin “The Burnouts”. Me një ton reflektues dhe frymëzues, ai tregoi se rruga drejt krijimit të perandorisë së tij të modës është ndërtuar mbi tre shtylla kyçe: puna e palodhur, guximi dhe manifestimi, një praktikë gjithnjë e më popullore në rrjetet sociale, veçanërisht në TikTok.
“Ëndrrat mund të bëhen realitet nëse i ndjek dhe mëson si t’i bësh realitet,” tha Hilfiger, duke theksuar se vështirësitë nuk janë barriera, por katalizatorë drejt inovacionit. “Duhet të gjesh një mënyrë për të kaluar sipër, poshtë, përreth ose përmes pengesës. Nëse dorëzohesh, thjesht po i bën vetes një shërbim të keq.”
Historia e Tommy Hilfiger është versioni klasik i “ëndrrës amerikane”. I lindur në Elmira, New York, i dyti ndër nëntë fëmijë, ai u rrit i frymëzuar nga muzika dhe stili i yjeve të rokut të viteve ‘60. Me mungesë dyqanesh që reflektonin këtë stil në qytetin e tij të vogël, ai vendosi të krijonte një mundësi për veten.
Me vetëm 150 dollarë, ai udhëtoi drejt Nju Jorkut, bleu 20 palë xhinse dhe i shiti nga bagazhi i makinës së tij Volkswagen Beetle. Shitjet i dhanë shtysën e parë dhe shpejt hapi dyqanin e tij të parë, People’s Place, i cili u kthye në një qendër të modës rinore në atë kohë. Megjithatë, suksesi nuk ishte i përhershëm: dyqani falimentoi në fund të viteve ’70.
Në vend që të humbiste besimin, Hilfiger e pa falimentimin si një nisje të re. Në vitin 1979 ai u shpërngul në Nju Jork për të filluar karrierën si stilist me kohë të plotë. Më vonë, biznesmeni Mohan Murjani vuri re talentin e tij dhe mbështeti debutimin e koleksionit të parë në vitin 1985.
Reklama gjigande e varur në Times Square, një veprim i guximshëm që e vendosi emrin e tij krah ikonave të modës, e bëri Hilfiger të famshëm brenda natës. Ai modernizoi veshjet klasike amerikane me një stil të freskët dhe më rinor, krijuar për një brez që kërkonte diçka të re.
Vitet ’90 shënuan shpërthimin e tij ndërkombëtar. Tommy Hilfiger u bë një markë e pop-kulturës: sponsorizoi turnetë e Rolling Stones, Britney Spears dhe Lenny Kravitz, bashkëpunoi me Beyoncé dhe Enrique Iglesias për aroma, realizoi fotosesione ikonike me David Bowie dhe Iman.
Marka u shtri në mbi 100 vende, duke u kthyer në një stil jetese me influenca nga muzika, arti, argëtimi dhe moda, një filozofi që ai e përmbledh me akronimin FAME.
Me kalimin e viteve, ai vazhdoi të bashkëpunonte me emra të mëdhenj si Rafael Nadal, Gigi Hadid dhe artistë legjendarë si Ramones dhe Keith Haring, duke mbajtur markën të freskët dhe të lidhur me trendet globale.
Krahas suksesit të jashtëzakonshëm profesional, Hilfiger ka qenë pjesë edhe e iniciativave humanitare përmes programit TommyCares, duke mbështetur organizata si Save the Children dhe World Wildlife Fund.
Ai është nderuar me çmime prestigjioze si: Geoffrey Beene Lifetime Achievement Award nga CFDA, Designer of the Year nga Parsons School of Design.
Pavarësisht arritjeve, Hilfiger mbetet i përulur dhe i besueshëm ndaj filozofisë së tij. Sipas tij, manifestimi, aftësia për ta parë një ide dhe për ta bërë realitet – është një pjesë thelbësore e procesit krijues.
“Ndoshta shoh një foto të Perëndimit të Egër dhe mendoj: a nuk do të ishte bukur të realizoja një fushatë xhini në Montana? Dhe papritmas, ja ku ndodh”, tregon ai.
Sot, Tommy Hilfiger vazhdon të jetë një simbol i inovacionit, optimizmit dhe diversitetit. Historia e tij mbetet një frymëzim për milionë të rinj në mbarë botën një shembull se si guximi, puna e palodhur dhe besimi në ëndrrat e tua mund të ndërtojnë një perandori të vërtetë.
