Pavarësisht se shumë mund të mendonin ndryshe, sot ishte e hera e parë që aktori turk, Tolgahan Sayisman, shkeli në tokën shqiptare: Në vendin e origjinës së bashkëshortes së tij, ish-Miss Shqipërisë dhe moderatores, Almeda Abazi.
“Iconstyle.al” fotografoi mbërritjen e çiftit ditën e sotme në aeroportin e Tiranës dhe takimi i tyre i parë ishte me kryebashkiakun Erion Veliaj.
Tashmë takimi me Veliajn është kthyer si një traditë për të gjithë personazhet e njohur që mbërrijnë në kryeqytet. “Iconstyle.al” arriti që të ishte pjesë e këtij takimi, në të cilin çifti shoqërohej nga nëna e Almedës, Albana.
Gjatë bisedës, Tolgahan konfirmoi se do të jetë pjesë e spektaklit “Dancing With the Stars” përmes një kërcimi:
“Jam shumë nervoz për kërcimin, për të cilin do të marr pjesë në prova”.
Aktori i njohur turk gjithashtu tregoi për punën e tij të lodhshme dhe oraret e zgjatura të xhirimeve.
“Shumicën e kohës e kaloj në sete xhirimin. Kohën që kam të lirë, siç erdha në Shqipëri, jemi të detyruar të promovojnë seriale në shtete të ndryshme. Xhirimet shpesh vazhdojnë deri në orën 06:00 të mëngjesit dhe do të zgjasin për 4 muaj. Në gusht nis të tjera xhirime për telenovelën e re”, tha Tolgahan.
Sakaq, përgjigja e Erion Veliajt ishte epike: “Mos u shqetëso! Po të kapi stresi mendo, që nuk je kryetar bashkie”.
Ylli i kinematografisë turke u shpreh se është shumë i lumtur që ka bashkëshorte bukuroshen shqiptare Almeda Abazi dhe tha se “do të vijë më shpesh në Shqipëri”.
Kreu i Bashkisë përmendi disa tipare të ngjashmërisë së Tiranës dhe Stambollit, duke theksuar afrimitetin mes dy vendeve:
“Një nga arsyet përse marrëdhënia mes Shqipërisë dhe Turqisë është e afërt, lidhet pikërisht me faktin se kemi krijuar familje bashkë”.
Në këto momente, Tolgahan përmendi faktin se dhe familja e tij ka emigruar për t’u vendosur në Stamboll.
