Koncesioni i shtrenjtë i francezëve (Kompania Aleat) të cilin qeveria shqiptare e lejoi për 15 vite me radhë t’u merrte shqiptarëve mbi gjysmë miliardë euro përfundoi. Mirëpo nga shiu, ramë në breshër!
Pavarësisht premtimeve për uljen e çmimeve, qeveria shqiptare do të vazhdojë të na i zbrasë xhepat njësoj edhe pas shtetëzimit të prodhimit të pasaportave dhe të kartave ID
Ish ministri brendshëm Bledi Çuçi deklaronte se letërnjoftimet biometrike do të prodhoheshin nga kompania shtetërore ‘IdentiTek’ dhe premtonte se me kalimin e këtij shërbimi nga privati tek shteti, do të rishikohej edhe çmimi i tyre
Por, ky ishte një tjetër mashtrim i qeverisë! Tarifa për kartat e identitetit mbetet e pandryshuar në 1500 lekë. Po ashtu edhe tarifa e pajisjes me pasaportë, 7500 lekë për aplikimin standard dhe 18 mijë lekë për aplikimin e shpejtë
Tashmë që monopoli i kaloi shtetit dhe qeveria nuk i uli çmimet, fitimet marramendëse nga xhepat e shqiptarëve do të shkojnë në arkën e qeverisë për t’u menaxhuar nga burokratët e shtetit!
Kryeministri s’ka lënë shërbim e pasuri publike pa dhënë me koncesion, si t’i kishte “plaçka” të tijat, ndërsa veprimi i radhës shqetësoi ndërkombëtarët, pasi qeveria e tij nuk ofron asnjë garanci se nuk do të keqpërdoren
Skandali me patronazhistët nuk ishte i vetmi që na tregoi shpartallimin e shtetit dixhital të Edi Ramës. Ajo u pasua me sulmin ndaj e-Albania, rrjedhjen e databazës së pagave, targave, numrave të telefonit, goditjen e sistemeve të Policisë së Shtetit dhe deri tek të dhënat e sistemit bankar
Kaq është mjaftueshëm për dëshmuar paaftësinë e shtetit tonë për të mbrojtur të dhënat sensitive, ndërkohë që synon të ketë fitime të larta si shifrat që kapën vlerën 15.5 milionë euro neto, por dëshiron të lehtësojë edhe nisma të tjera të rrezikshme si amnistia fiskale apo Pasaportat Gold
Menaxhimi i të dhënave tona sensitive nga patronazhistët dhe klientela e Ramës duket një vendim i rrezikshëm jo vetëm për xhepat, por edhe për sigurinë e secilit prej nesh!
