Një vajzë e re është plagosur rastësisht në Tiranë, pas një përplasjeje me armë mes një efektivi dhe një qytetari i cili nuk u ishte bindur urdhrave të uniformave blu.
Drejtori i Policisë së Tiranës Rebani Jaupi tha për mediat, se një punonjës policie i ka kërkuar një qytetari dokumentet, dhe e ka pyetur se çfarë kishte në çantë, ndërsa personi nuk u është bindur urdhërave të tij, por i ka drejtuar armën.
I gjendur në këto rrethana efektivi i Shqiponjave ka qëlluar në drejtimin e tij duke e lënë të plagosur. E plagosur ka mbetur edhe një vajzë e cila po kalonte rastësisht aty.
Qytetari që i drejtoi armën policit, është identifikuar si Orges Bilbili, i akuzuar si një nga autorët e masakrës së Lushnjes së bashku me Laert Haxhiun.
ABC News raporton se ai akuzohet edhe si bashkëpunëtor i pilotit italian Giorgio Riformato, avioni i të cilit, ngeci në bregdetin e Divjakës, teksa po përgatitej për të trafikuar lëndë narkotike nga Shqipëria për në Itali.
Aktualisht, janë jashtë rrezikut të dy të plagosurit, në spitalin e Traumës. Efektivi nuk është qëlluar, por ndodhet në drejtorinë e policisë Tiranë për veprimet procedurale.
Deklarata e drejtorit të Policisë Tiranë:
Një punonjës policie që i ka kërkuar dokumentet një qytetari, nuk i është përgjigjur, në momentin kur e ka pyetur se çfarë kishte në çantë ai ia ka mbathur.
Qytetari i ka drejtuar armën punonjësit të policisë, polici ka qëlluar në ajër. Qytetari ka lëvizur përsëri me vrap, dhe kur e ka lajmëruar sërish, qytetari ka kanosur policin. Polici e ka plagosur personin në pjesën e këmbës. Në afërsi të kësaj skene ka qenë dhe një qytetare, që po ashtu ka mbetur e plagosur.
Punonjësi i policisë që është me përvojë i ekipit të Shqiponjave, ishte i vetëm, dhe ka vepruar në bazë të procedurave standardë të punës, ne kemi ngritur grupin e punës për identitetin e personit që pak a shumë kemi një emër por do jua bëjmë me dijë me vonë.
Momentalisht janë jashtë rrezikut të dy, në spitalin e traumës po punojnë mjekët. Efektivi nuk është qëlluar, është në drejtorinë e policisë Tiranë për veprimet procedurale.
/FAXNews
