Kryeministri i vendit Edi Rama gjatë një video-konference live me gazetarët para pak minutash ka bërë me dije detaje të tjera përsa i përket planit të rihapjes.
Ai theksoi se Tirana mbetet ende problem dhe nuk do të ketë lehtësime as për këtë javë. Sipas tij lokalet, transporti dhe turizmi janë pikat më të rrezikshme dhe do të monitorohen me shumë kujdes.
“Dua të sjell në vëmendje që masat lehtësuese do të vijojnë. Tirana mbetet problem ende edhe lehtësimi në Tiranë apo në zonat e kuqe. E pamundur këtë javë. Në pjesën tjetër do të vijojnë. Kemi diskutuar hapjen e kopshteve dhe çerdheve më 1 qershor. Nëse numrat do të vazhdojnë stabil ne mund t’i hapim dhe kjo kohë duhet shfrytëzuar për të bërë kushtet. Do të hyjnë në klasa me rregulla komplet të tjera dhe do të mund të kenë një periudhë 3-javore para maturës shtetërore. Do të vazhdojmë lehtësimin e qarkullimit jo në zonat e kuqe. Zgjatjen e fashave të orareve. Shtrirja e fashës orare sidomos në orën kur mbaron puna ka shqetësimin për nevojën për t’u grumbulluar dhe rrit tundimin për të hapur lokale. Kemi parë disa vende që kanë bërë hapa të shpejtë, si Serbia. Do shohim si shkojnë gjërat aty lidhur me epideminë. Dua të përsëris që lokalet duhet të marrin masat sepse lokalet 1, transporti 2, turizmi 3 janë pika shumë të nxehta dhe të rrezikshme. Lokalet do të monitorohen nga shumë afër dhe nuk dua t’i penalizojmë. Prandaj merrni masat e rrepta dhe respektojini pasi duhet të mbroni personelin dhe popullin pikërisht për të mos rikthyer zinxhirin e infeksionit”, u shpreh Edi Rama.
Ndër të tjera ai foli edhe për transportin publik ku deklaroi se në fillim të qershorit mund të mendohet lëvizja me urban.
“Kemi filluar punë për një strategji adaptimin të transporti që e paraqesim në fillim të qershorit si do të jetë në vijim jo vetëm për tu mbrojtur nga virusi që do jetë mes nesh për një kohë të gjatë”, tha Kryeministri.
Përsa i përket turizmit, Edi Rama tha se është jashtëzakonisht e vështirë për të menduar se çfarë do të ndodhë këtë verë me këtë sektor.
“Është një thikë shumë e mprehtë, me dy presa, sepse rreziku është shumë i madh, por edhe mbyllja përtej një garancie ekuilibri mes ruajtjes së shëndetit dhe mbrojtjes së njerëzve nga katastrofa ekonomike është një domosdoshmëri. Kështu që jemi duke diskutuar për këtë, po shohim çfarë po bëjnë vendet e tjera. Si nga dita e parë, e në vijim, asnjë vend nuk ka një përgjigje definitive, të gjithë ecin pak në mënyrë somnabulike, me duart përpara dhe sytë mbyllur. Jemi duke e përpunuar vendimmarrjen dhe brenda pak ditësh do ta bëjmë publike. Masat janë lehtësuar dhe do vazhdojnë të lehtësohen.Brenda muajit ne duam që kufijtë tokësor të hapen. Ne kemi hequr tashmë karantinimin në hotel. Shengeni është i mbyllur, ndaj dhe fluturimet janë të kufizuara. Është një dilemë e jashtëzakonshme. Mundësia e një vale të re nuk është e vogël dhe nëse numrat kërcejnë përtej pritshmërisë së arsyeshme do jemi të detyruar të rimbyllemi, që do të ishte e rëndë për të gjithë. Ndaj është shumë e rëndësishme për të gjithë, që të bëjmë çmos për të ruajtur veten dhe të tjerët, duke respektuar rregullat e thjeshta, jo fort të këndshme, se mund të kthehemi në situata më të vështira. Mund të gjendemi jo vetëm të mbyllur, por shumë më seriozisht të ekspozuar. Përgjigjja e sinqertë është se është një dilemë shumë e madhe. Nuk është cështja a do hapet turizmi, cështja është si? Shikoja cadra 5 metra distancë, parcelizim, janë improvizime që bëjnë vende të ndryshme, por realisht të gjithë ecin me duar përpara e me sy mbyllur”, u shpreh Rama.
