Ndeshja e shumëpritur e Shqipërisë, luajtur në “Renzo Barbera” të Palermos rezultoi një zhgënjim i dyfishtë jo vetëm për rezultatin 2-0 por edhe për sjelljen e tifozëve shqiptarë, që detyruan shtyrjen e ndeshjes.
Kuqezinjtë e nisën ndeshjen në mënyrën më të mirë të mundshme dhe kërcënuan Italinë që në minutën e parë, me një goditje të Cikalleshit, e cila përfundoi jashtë. Menjëherë më pas, është mesfushori fierak, Roshi, i cili dërgon jashtë kuadratit, një top të goditur nga distanca.
Më pas, në minutën e 11′ vjen momenti i kthesës. Gjatë një goditje dënimi, arbitri gjykon si penallti një kontakt thuajse inekzistent mes Belottit dhe Bashës. 11-metërshin e ekzekuton De Rossi dhe kalon Italinë në avantazh.
Minutat në vijim, vihet re një lojë deri diku e barabartë, ku Italia ka një shans të mirë me Belottin, të pritur nga portieri debutues Strakosha, ndërsa Shqipëria ka dy mundësi të shkëlqyera me Roshin, njëra e pritur nga Buffon dhe tjetra e goditur jashtë kuadratit.
Pjesa e dytë fillon pa asnjë ndryshim nga e para, por një grup pseudotifozësh shqiptarë kanë menduar të prishin spektaklin dhe bukurinë e kësaj ndeshjeje, duke hedhur flakadanë në fusha, çka ka sjellë ndërprerjen e saj për rreth 15 minuta, nga ana e gjyqtarit kryesor të takimit. Në minutën e 71′-të , arbitri bëhet sërish protagonist me akordimin e një faulli të paqenë në favor të italianëve dhe aksioni pas ekzekutimit të tij solli golin e dytë të shënuar nga sulmuesi i Lazio-s, Ciro Immobile.
Ndeshja u mbyll 2-0 për Italinë, duke pësuar kështu një zhgënjim jo vetëm për golat e Italisë por edhe “golin” e tifozëve i cili do të mbahet mend më gjatë se performanca e futbollistëve.
