Pak para fillimit të derbit Tirana-Partizani, stadiumi “Selman Stërmasi” u kthye në një shesh lufte.
Tifozët nisën të përlesheshin me njëri-tjetrin dhe pati mjaft të plagosur. Por sot, një ditë pas sherrit të dhunshëm është zbuluar një tjetër skenar i tifozëve bardheblu, të cilët kishin parashikuar të sulmonin rëndë kundërshtarët.
Sipas “Report Tv”, “Capital Crew”, i cili njihet si grupimi më i dhunshëm i tifozëve bardheblu, kishte hapur tre gropa të mbushura me një sasi lënde piroteknike me qëllim që godisnin tifozët e Partizanit në tribunën përballë.
Por fatmirësisht këtë e kishte zbuluar një efektiv policie, i cili duke ecur ishte penguar tek fitili duke zbuluar kështu të gjithë planin. Për këtë plan dashakeq, dy persona janë shpallur në kërkim.
Ndërkohë, sa i përket dhunës në stadium, pak para nisjes së ndeshjes, uniformat blu kanë arrestuar një tifoz, Elton Bande, 29 vjeç e ndërsa janë vënë në hetim 6 të tjerë. 29-vjeçari ka qenë në arrest shtëpie, por ai e ka thyer për të qenë i pranishëm në stadium.
Mbi tifozët e proceduar rëndon akuza për veprat penale për veprat penale për “Shkelja e rregullave mbi lëndët plasëse dhe radioaktive” “Dëmtime të tjera me dashje”, “Prishja e qetësisë publike”, “Plagosja e lehtë me dashje” dhe “Largimi i të burgosurit nga vendi i qëndrimit”.
