Ndërsa shumë vende të botës po përpiqen që të mbajnë nën kontroll valën e dytë të pandemisë së koronavirusit, Tajvani ka shënuar 254 ditë radhazi pa asnjë rast lokal me Covid-19.
Rasti i parë që nga muaji prill u konfirmua ditën e djeshme, duke i dhënë fund shtrirjes më të gjatë në botë pa infeksione vendore.
Ministri i Shëndetësisë Chen Shih-Chung tha se rasti lokal ishte në kontakt të ngushtë me një pilot të Zelandës së Re i cili ishte konfirmuar me Covid-19 të dielën e kaluar. Autoritetet theksuan se piloti, në moshën 60-vjeçare, ka udhëtuar drejt Tajvanit nga 8 deri më 11 dhjetor.
Është hera e parë që nga 12 prilli, pas një pauze prej 8 muajsh, që një rast i transmetuar në familje është raportuar në Tajvan.
Tajvani që nga fillimi i pandemisë ka raportuar 771 raste të koronavirusit. Rasti i fundit që ishulli me 23 milionë banorë raportoi me koronavirus ishte në 12 prill, të dielën e Pashkëve. Pavarësisht se është afër Kinës dhe ka vëllime të larta udhëtimesh dhe tregtie, Tajvani ka regjistruar vetëm shtatë vdekje nga Covid-19 gjatë kësaj periudhe të pandemisë.
Tajvanit nuk i është dashur kurrë të vendosë masa të rrepta. As nuk iu drejtua kufizimeve drastike të lirive civile, si në Kinën kontinentale. Por në vend të kësaj, përgjigja e Tajvanit u përqendrua në shpejtësinë.
Autoritetet tajvaneze filluan të kontrollonin pasagjerët e fluturimeve direkte nga Wuhan, ku virusi u identifikua për herë të parë, në 31 dhjetor të vitit 2019.
Rastin e parë Tajvani e konfirmoi në 21 janar të 2020-s. Menjëherë ndaloi banorët e Wuhan që të udhëtonin drejt ishullit. Të gjithë udhëtarëve që mbërrinin nga Kina kontinentale, Hong Kong dhe Makao u kërkohej t’i nënshtroheshin testimit të Covid-19.
Si Tajvani dhe Zelanda e Re i kanë treguar pjesës tjetër të botës se si trajtohet pandemia.
