Muajin e fundit qytetarë të shumtë kanë denoncuar raste, sipas të cilave u është kërkuar që të afërmit e tyre që kanë humbur jetën për shkak të pandemisë t’i regjistrojnë si të vdekur nga Covid-19.
Rasti që mori më shumë vëmendje ishte ai i ambientalistit të njohur Sazan Guri, i cili nëpërmjet një statusi në Facebook thoshte se i ati i një mikes së tij vdiq nga probleme me zemrën, por një agjenci funerale i kishte premtuar ceremoni varrimi falas, në këmbim të një 1 milion e 200 mijë lekëve të vjetra, nëse e regjistronte të atin si të vdekur nga Covid-19.(Lexo këtu)
Së fundmi, në një intervistë në studion e Abc News, mjeku infeksionit Pëllumb Pipero foli rreth këtyre teorive, pasi gazetari Endri Xhafo i lexoi mjekut një mesazh që i kishte mbërritur nga një qytetare, e cila i ka shprehur mosbesimin e saj për ekzistencën e koronavirusit.
Sipas saj pas vdekjes së një të afërmi, familjarëve u është kërkuar që ta deklarojnë si viktimë të koronavirusit. Mirëpo, sipas Piperos kjo nuk ka mundësi të ndodhë, pasi duhet letër konfirmuese nga mjeku infeksionit që e ka ndjekur.
“Nuk mund të ndodhë pavarësisht se çfarë thonë. Pa një letër konfirmuese nga mjeku që është Covid nuk ka shanse të ndodhë kjo gjë. Nuk duhet ta besojmë”, u shpreh Pipero.
Më tej, mjeku rrëfeu një bisedë të tij me një farmaciste 26-vjeçare e prekur nga Covid-19.
“Një farmaciste nga Durrësi më mori ne tel pardje më tha jam keq. Kam dalë pozitive dhe jam keq dhe më vjen keq që kam qenë njeriu mosbesues që thoja mashtrohet populli. Sapo ju thashë që ka dy realitete. Kur më shohim mua më thonë ‘o Pipero po vërtet ka Covid mo’. Në spital po hyre i sëmuri nuk të lëshon nga dora se është i vetëm. Realiteti i spitalit është ndryshe. Mua më vjen keq që numrat te ne janë rritur se jemi të shkujdesur”, tha Pipero, ndërsa apeloi edhe njëherë për përdorimin e maskave nga qytetarët. Sipas tij maska është e vetmja mënyrë për të ulur numrin e rasteve.
Pipero ndër të tjera u shpreh se ende nuk ka protokolle të përcaktuara për këtë sëmundje dhe se tashmë edhe mjekët e familjes janë në dispozicion të pacientëve, ndërsa sqaroi se ata janë trajtuar nga Urgjenca Kombëtare.
“Nxitimi për të dhënë antibiotik pa pasur klinik është i gabuar. Dua të them që mjeku i familjes është trajnuar jo vetëm nga Urgjenca Kombëtare, por edhe nga ne. Janë bërë disa trajnime dhe di të them se i kemi trajnuar dhe ky është një nga avantazhet që ka mjeku i familjes në përballjen me COVID-19. Nuk duhet të nxitohemi, skema për tu përdorur ndryshon sipas fazave të sëmundjes. Ata që kanë nevojë për trajtim u kemi dhënë skema të duhura. Nëse ka vështirësi në frymëmarrje komunikohet me 127″, u shpreh mjeku infeksionist.
Sakaq Pipero theksoi se prej rreth 4 apo 5 muaj spitali i sëmundjeve Infektive ka një ngarkesë shumë më të madhe dhe se stafi mjekësor është me të vërtetë i lodhur. Por pavarësisht kësaj shtoi ai, do vijojë puna për t’i ardhur në ndihmë qytetarëve, ndërsa u bëri apel që të sensibilizohen sa i përket mbajtjes së maskës.
