Të gënjesh ditën për diell e të vjedhësh hapur miliona shqiptarë askush nuk e bënë më mirë se Thoma Gëllçi. Drejtuesi i RTSH-së tashmë duket se është bërë ekspert i kësaj fushe dhe nuk e ka problem të marrë tufa me para në emër të “transmetimeve sa më cilësore” në televizion. Cilësinë në RTSH nuk e kemi parë kurrë, ndaj nuk arrijmë ta kuptojmë ku shkojnë paratë që merren me tendera me pretekstin për përmirësim shërbimesh.
Tender 400 milionë lekë për arkivën e televizionit
Tenderat abuziv të Thoma Gëllçit nuk kanë fund dhe njëri nga ata është edhe ai për shtimin e arkivës numerike në televizion. Drejtuesi i RTSH-së i ka dhënë në vetëm një tender plot 385 milionë lekë të vjetra një kompanie të regjistruar me emrin “S&T Albania” për “Furnizim-Vendosje Paisje dhe Programe për shtimin e Arkivave numerike”.
Gjithçka ka qenë e përgatitur në mënyrë perfekte, sepse në garë janë përfshirë dy kompani, ajo e përmendur më sipër dhe një tjetër që nuk ka paraqitur asnjë ofertë ekonomike. Pas kësaj lëvizje kuptohet qartësisht se kush do e fitonte tenderin dhe si i ndan paratë Gëllçi me kompanitë “fituese”.
Miliona lekë për miqtë
Përveçse të “rrëmbej” diçka për vete, Thoma Gëllçi sigurohet që të mos i lërë thatë edhe miqtë e tij.
Para 1 muaji ai hapi një procedurë prokurorimi për “blerje shërbimi për platformën OTT” me fond limit 85.113.600 lekë të reja pa TVSH. Në tenderin në fjalë ka marrë pjesë sërish vetëm një kompani (bashkim operatorësh) që ka ofruar një shifër sa 99.7% e fondit limit të tenderit, rreth 1 miliardë lekë të vjetra me TVSH. Duke qenë e vetme në garë kompania në fjalë nuk e ka pasur fare të vështirë të fitojë paratë duke “ofruar në shkëmbim” shërbimin e lartëpërmendur.
E veçanta në këtë tender qëndron pikërisht tek kompanitë fituese, që kanë si pronar miqtë më të afërt të Gëllçit. Kompania “MC Networking” shpk ka si pronar dhe administrator djalin e ish-kryeministrit Aleksandër Meksi, Endri Meksin. Nga ana tjetër kompania e dytë “Advan Tech“ ka si pronar dhe administrator Oltion Bushin.
Nuk duhet të harrojmë se i njëjti Thoma Gëllçi pagoi 3.2 milionë euro për transmetuar 18 ndeshje të UEFA Champions League në RTSH. Këtë gjë ai e shiti si një sakrificë të tijën, duke mos e përmendur fare faktin që paratë që dha janë grumbulluar nga taksat e shqiptarëve.
Se çfarë na ofron RTSH-ja jemi të gjithë të vetëdijshëm, prandaj shpresojmë që Gëllçi të mos bëj më “sakrifica” të tilla dhe të heqë dorë sa më parë nga vjedhjet e parave tona.
