Emergjenca Covid-19 ishte një goditje e fuqishme për turizmin shqiptar, i cili më shumë se kurrë ka nevojë për ndihmë që të ngrejë krye sërish. Masat e izolimit e frika e përgjithshme e infektimit nga virusi i rrezikshëm pritet të reduktojnë në mënyrë drastike numrin e turistëve që vizitojnë vendin tonë.
Mirëpo, teksa në studiot televizive e mbledhjet e qeverisë flitej vazhdimisht për strategji për ta bërë Shqipërinë sa më tërheqëse për ata që do të kenë mundësi ta vizitojnë, në fakt ndodhi një rritje drastike e çmimeve.
Blogerja e udhëtimeve Fjorda Llukmani, tregoi se këtë vit janë rritur në mënyrë drastike çmimet për të vizituar parkun arkeologjik të Butrintit.
Në një prononcim për “iconstyle.al”, ish-drejtori i qendrës Arkeologjike të Butrintit, Auron Tare ka thënë se rritja e çmimit duhet të reflektojë shërbimin që marrin qytetarët në këtë qendër arkeologjike. Sipas tij, problemi kryesor është prishja e sistemit të operimit në Butrint, dhe shuma hallka të tjera në menaxhimin e një qendre, që është pjesë e UNESCO-s. (Lexo këtu)
Mirëpo, duket se strategjia që do t’i largonte më shumë turistët tashmë është rregulluar.
Në mbledhjen e mbajtur në Apoloni, ministrja e Kulturës, Elva Margariti, dhe ministri i Turizmit dhe Mjedisit, Blendi Klosi, kanë prezantuar paketën e re turistike, e cila përfshin ulje të çmimeve.
“Kemi dalë me një paketë të re ofertash që vihen në vijim edhe të bisedave të bëra me të gjithë tur-operatorët, edhe për t’ju gjendur më afër juve, sepse mendojmë se ky është momenti kyç që t’ju gjendemi pranë, pasi mendojmë fort që në këtë vit të kemi gjithmonë e më tepër një turizëm lokal, e ndoshta do të kemi më pak turistë të huaj, megjithatë dhe në momentin që do të kemi turistë të tjerë të huaj, ne do t’u përgjigjemi me shërbime të reja në sitet tona.
Kemi arritur që vitin e shkuar të kemi mbi 1 milion vizitorë dhe mendojmë që me këtë politikë të re dhe ato site që nuk kanë qenë të vizituara të bëhen sa më shumë pjesë e paketave tuaja. Kemi biseduar së bashku për disa muze, sikur dhe për Muzeun e Gjetheve që ka qenë një nga pikat ku dhe vetë tur-operatorët kanë thënë që iu duket pak jo i aksesueshëm për paketat e tyre. E kemi arritur tashmë në një çmim thuajse simbolik dhe këtë e kemi bërë dhe për shumë site dhe mendojmë që kjo është zgjidhja e duhur për t’ju gjendur pranë në këto momente”- ka thënë Margariti.
