Një e moshuar nga qyteti i Vlorës ka bërë një thirrje të dëshpëruar përpara kamerës së “Abc News”, duke kërkuar ndihmë që së paku të ushqehet.
Megjithëse qeveria ka ndaluar qarkullimin e pensionistëve, ajo ka dalë për blerë bukë dhe shprehet se jeton vetëm dhe s’ka kush të kujdeset për të.
E moshuara tregon se është prej 2 ditësh pa ngrënë dhe po pi ujë me sheqer, ndërsa tregon se ka kontaktuar me Bashkinë e Vlorës por askush nuk i ka shkuar për ndihmë.
“Unë jam vetëm, jam 84 vjeçe. Jam pa njeri fare në shtëpi, nuk kam as ndihmë. Të paktën na sill një pako makarona o vëlla, po pi ujë me sheqer. Çfarë bëhet kështu? Edhe do dal, le të më marri të më fusi në burg policia, se unë po rri pa ngrënë. I dërgova sekretares së Dritan Lelit dhe ajo nuk e vuri ujin në zjarr.
Kam 2 ditë pa bukë. Ujë me sheqer piva mbrëmë, nuk më zinte gjumi. Të paktën sikur një dorë makarona, të kisha bërë një supë. Po unë nuk i kërkoj lagjes. Ose të më japin pensionin dhe të iki.
Rama tha bëjeni në Facebook “Shqipëriaqëduam.al”. Unë ku di ta bëj? Unë do iki pa u ngopur në gropë. Kam helm, e kam të ruajtur aty. E do ta pi, më mirë ashtu. S’po më zë as virusi, se unë kam dalë.”- shprehet e moshuara me lot në sy.
