Të gjithë e dinë që shfaqja e thinjave është normale dhe është shenjë e pritshme e plakjes. Shumë prej të rinjve që shohin thinja në flokët e tyre, mendojnë se kjo është edhe një shenjë pjekurie.
Por ato mund të jenë edhe shenja të problemeve të ndryshme shëndetësore. Më saktësisht, hulumtuesit e “Universitetit të Kairos” në Egjipt kanë zbuluar se shfaqja e shpejtë e thinjave është e ndërlidhur me një rrezik më të lartë të zhvillimit të sëmundjeve të zemrës, pavarësisht moshës që keni.
“Plakja është faktor i pashmangshëm i rrezikut koronar dhe ndërlidhet me shenja dermatologjike të cilat mund t’ju paralajmërojnë për një rrezik të shtuar të zhvillimit të sëmundjeve të ndryshme”, ka treguar Dr. Irini Samuel, kardiologe në Universitetin e Kairos.
Për studimin e tyre, hulumtuesit kishin ekzaminuar 545 meshkuj , të cilët i kishin ndarë në grupe të ndryshme dhe kishin parë se meshkujt që zhvillonin më shpejt thinjat, kanë rrezik më të shtuar të sëmundjeve të zemrës.
