Tokio theu tabutë e obezitetit duke realizuar një sfilatë mode me 11 modelë të masës “ekstra-large”. Koleksioni “Pochari” u realizua nga marka e veshjeve të masave të mëdha, Sakazen Shoji Co dhe revista e modës Mr Babe, duke përfshirë meshkuj mbi 100 kg që ecnin, kërcenin dhe pozonin në pasarelë.
Eventi i së enjtes mblodhi mbi 100 njerëz, që ishin ftuar për të përfituar nga zbritja në veshjet e koleksionit, por organizatorët thanë se nuk lidhej vetëm me shitjet.
Qëllimi i koleksionit të veshjeve me djemtë dhe burrat “ekstra-large” ishte thyerja e tabuve të obezitetit. Pesha mesatare e një mashkulli të rritur në këtë vend është vetëm 66 kg.
Shpresat janë që përmes sensibilizimit të ndryshojë qëndrimi ndaj masave plus në Japoni, ku niveli i obezitetit është ndër më të ulëtit në botën e zhvilluar. Njerëzit e shëndoshë atje shpeshherë nëpër televizione paraqiten si figura për t’u vënë në lojë.
“Dua të përhap idenë se njerëzit trupmëdhenj, që kanë probleme me gjetjen e rrobave të përshtatshme, kanë mundësi zgjedhje nga një gamë e tërë veshjesh e të shijojnë të qenit modern”, tha Li Tianëei, menaxheri i shitjeve të Sakazen Shoji.
Për 11 modelët amatorë, kjo ishte në mënyrë e shkëlqyer për të rritur besimin tek vetja. “Gjithmonë më ka ardhur turp për peshën time, por tani shikoj se mund t`i kthej kilogramët e tepërt në avantazhin tim”, tha 25-vjeçari Takuya Shirase.
Pas suksesit të sfilatës, organizatorët po mendojnë që në 2017-n ta zgjerojnë atë edhe me modele të shëndosha femra.
*Shfleto galerinë
Burimi: Reuters
