Krimi brenda familjes tronditi qytetin e Durrësit pasditen e djeshme. Një 25-vjeçar me origjinë nga Dibra masakroi me thikë babin e tij 75-vjeçar, Destan Neziri, dhe nënën 64-vjeçare, Hasije Neziri. Dy të moshuarit kanë përfunduar në spital në gjendje të rëndë dhe ndodhen në reanimacion nën kujdesin e mjekëve.
Një orë pasi ndodhi krimi makabër është arrestuar edhe autori i krimit, Hajri Neziri, i cili së bashku me të fejuarën e tij ndodhej në Spitalin e Traumës në Tiranë.
Mësohet se fillimisht 25-vjeçari ka debatuar ashpër me prindërit dhe më pas në gjaknxehtësi e sipër ai i ka qëlluar me thikë të moshuarit, duke iu shkaktuar plagë të shumta. 64-vjeçarja mësohet se është goditur 6 herë me thikë në bark, ndërsa 75-vjeçari ka marrë një goditje thike në qafë dhe një në fytyrë.
Menjëherë pasi ka ndodhur krimi 25-vjeçari i ka lënë prindërit në gjendje të rënduar më shtëpi dhe është larguar së bashku me të fejuarën. Ai ka shkuar në Spitalin e Traumës në Tiranë për të mjekuar plagët që ka marrë nga sherri me prindërit, ku dhe është arrestuar nga policia.
Burime nga vendngjarja flasin se bëhet fjalë për një masakër të vërtetë dhe të gjithë janë tmerruar teksa kanë parë të moshuarit të dalin nga dera e shtëpisë të mbytur në gjak. Me ndihmën e fqinjëve ata u transportuan për në spital.
Pas arrestimi 25-vjeçari, Hajri Veziri është dërguar në komisariatin e Durrësit ku është marrë në pyetje. Burime nga grupi hetimor, për “Gazetën shqiptare” kanë bërë me dije se i riu ka dhënë shumë pak detaje në lidhje me ngjarjen dhe ka shfaqur shenja depresioni.
Në lidhje me ngjarjen e ndodhur është marrë në pyetje edhe e fejuara e tij, e cila ishte e pranishme në momentin e sherrit.
“Po shikonim të katërt ndeshjen e radhës së kampionatit botëror. Ishim të qetë, nuk kishim sherre dhe asgjë. Vjehrra ime që është një grua e sertë nisi të debatojë me të fejuarin tim, duke i thënë se nuk punon, se të dy ishim të papunë. Ishte sherr i çastit. Unë u dashurova me djalin e saj, por ajo nuk me donte pasi unë jam nga Puka. Në sherr e sipër, Hajriu u përlesh me të ëmën dhe e goditi disa herë me thikë. Pastaj ndërhyri vjehrri që t’i ndante, por i fejuari im e goditi dhe atë me thikë. Unë ndërhyra që t’i ndaja. Nuk mbaj mend më se çfarë ndodhi, por pashë se shtëpia u bë gjithë gjak. Dhe unë u bëra me gjak në krah dhe në fustan. Pastaj ikëm nga shtëpia se ishim terrorizuar. Të fejuarit tim i rridhte gjak nga dora, ndaj shkuam në Spitalin e Traumës në Tiranë. Shkaku i gjithë asaj që ndodhi ishte vjehrra ime”,- është shprehur e reja.
Policia ka marrë në pyetje edhe 75-vjeçarin, i cili ka thënë se ndërhyri për të shpëtuar gruan nga djali.
“Aman më shpëtoni gruan që e goditi djali”, mësohet të ketë thënën 75-vjeçari në Spitalin e Durrësit.
Burimi: Gazeta Shqiptare
