Polici i njësisë “Shqiponja” Nevaldo Hajdaraj u njoh sot me masën e sigurisë “arrest me burg” nga gjykata, pasi akuzohet për vrasjen e 25-vjeçarit Klodian Rasha. Hajdaraj ka qëlluar me dy plumba në drejtim të të riut dhe njëri prej tyre i mori jetën. Kryeministri Edi Rama e cilësoi ditën e djeshme gjatë një deklarate si një akt absurd dhe të pashpjegueshëm, por çfarë po mbahet e fshehtë nga strukturat e policisë në lidhje me ngjarjen?
Gjatë ditës së sotme burime të sigurta kanë zbuluar se Nevaldo Hajdaraj ka qenë nën efektin e lëndëve narkotike gjatë kryerjes së shërbimit dhe kjo ka ndikuar në faktin e kapërcimit të çdo limiti. Por deri më tani nuk ka dalë asnjë raport mjekologjior dhe e gjithë kjo po mbahet e fshehtë për të mos thelluar më tej skandalin në radhët e Policisë së Shtetit. Raporti mjekologjior që e vërteton këtë gjë do të dyfishonte edhe dënimin për policin e njësisë “Shqiponja”, i cili në deklaratën e tij është shprehur se është ndjerë i rrezikuar nga Klodian Rasha ndaj e ka qëlluar me armë.
Gjatë ditës së sotme ministri i Brendshëm, Sandër Lleshaj, pranoi se ka dhënë dorëheqjen e parevokueshme, por kjo çështje nuk duhet të mbyllet me kaq. Raporti mjekoligjor për Hajdarajn duhet të dalë patjetër dhe në çdo lloj rasti gjithë struktura nga Drejtoria e Policisë, te Shërbimi i Çështjeve të Brendshme dhe Ankesave deri tek Forcat Shqiponja, duhet të largohen! Duke iu bashkuar nismës së protestuesve, që në fillim të ngjarjes “Iconstyle.al” ka kërkuar largimin e:
-Muhamet Rrumbullaku, drejtor i SHÇBA, që manipuloi hetimin.
-Ardi Veliu, drejtori i Policisë së Shtetit.
-Gjovalin Loka, drejtori i Departamentit për Sigurinë Publike, mban përgjegjësi për dhunën ndaj protestuesve.
-Rebani Jaupaj, drejtor i Policisë Tiranë duhet të mbajë përgjegjësi pse policia ishte pa kamera në trup natën e ekzekutimit të Klodianit.
Përveç manipulimit të hetimeve, të gjithë të pëmendurit më sipër po mbajnë të fshehtë edhe raportin mjekoligjor që vërteton faktin se Nevaldo Hajdaraj ka qenë nën efektin e lëndëve narkotike gjatë kryerjes së shërbimit. Për më tepër strukturat janë përpjekur të hedhin baltë edhe mbi të ndjerin, Klodian Rasha, duke deklaruar se ai kishte pasur një pistoletë që u gjet shumë larg vendit të ngjarjes dhe që sot rezultoi se nuk kishte asnjë shenjë gishtash, sepse ishte gjetur në një pellg me ujë.
Kujtojmë se ditën e sotme është paralajmëruar sërish protestë në orën 18:00 për të vënë drejtësinë për vrasjen e Klodian Rashës dhe për të reformuar sistemin policor në vend.
