Keqtrajtimet ndaj qenve endacakë janë bërë shkak për disa protesta të njëpasnjëshme në vendin tonë nga qytetarët që mbrojnë të drejtat e kafshëve. Ditët e fundit janë bërë shumë denoncime në adresë të Bashkisë së Tiranës, për mënyrën e trajtimit të qenve. “ARSA Albania” ishte e parë që publikoi një video rrëqethëse që tregonte se si kafshët e gjora tërhiqeshin zvarrë për t’u vrarë me acid klorhidrik në zemër në një spital qensh.
Pikërisht për këtë vepër makabre, qytetarë të thjeshtë dhe personazhe të njohur të showbiz-it iu bashkuan për ditë me radhë protestave kundër rrëmbimit dhe vrasjes së qenve. Ndërkohë që pritej një reagim nga Bashkia e Tiranës në lidhje me këtë çështje, kryetari i saj, z.Erion Veliaj e mohoi keqtrajtimin e qenve teksa ishte i ftuar një mbrëmje në emisionin “Opinion”. Për më tepër Veliaj u shpreh se bashkia bashkëpunon me disa organizatat europiane dhe britanike për mbrojtjen e tyre dhe ndër të tjera përmendi organizatën më të njohur në botë për mbrojtjen e të drejtave të kafshëve “Four Paws”.
Mirëpo organizata e ka mohuar një gjë të tillë, përmes një emaili zyrtar të dërguar në adresë të “ARSA Albania”.
“Dëshirojmë të bëjmë të ditur se FOUR PAWS (Katër Putrat) aktualisht nuk bashkëpunon me Bashkinë e Tiranës për çështjen e kafshëve endacake.
FOUR PAWS përkrah dhe mbron implementimin e programeve të menaxhimit human të kafshëve endacake, përfshirë sterilizimin masiv, adresimin e shkaqeve të braktisjes së kafshëve dhe inkurajimin e pronësisë së përgjegjshme të tyre, në mënyrë që të reduktohet numri i kafshëve endacake në komunitetin lokal. Kjo përqasje është shkencërisht e provuar si mënyra më efektive dhe më e njerëzishme e reduktimit të kafshëve endacake brenda komunitetit.
FOUR PAWS dënon fuqishëm vrasjen e maceve dhe qenve endacakë si mënyrë kontrollimi e popullatës jo vetëm për shkak të vuajtjeve që kjo iu shkakton kafshëve, por edhe sepse kjo është një mënyrë jo efektive, jo njerëzore dhe e kushtueshme për të mbajtur reduktimin e numrit të kafshëve endacake në periudha afatgjata.”- shkruhet në e-mailin e shkruar nga “Four Paws”.
Nga vetë fjalët e organizatës së njohur në mbarë botën, kuptohet se deklarata e bërë nga Veliaj ishte thjesht një mashtrim i radhës. Kryetari i Bashkisë nga ana tjetër ka marrë një zgjidhje nga grupimi për të drejtat e kafshëve, të cilës ai nuk i është përgjigjur ende. Grupimi për të Drejtat e Kafshëve në Tiranë, ka përgatitur një listë me kërkesa drejtuar Bashkisë, për t’i dhënë fund njëherë e mirë zgjidhje këtij problemi.
