Sheshi “Skënderbej” do të hapet mbrëmjen e së shtunës, ndërsa po i jepet dora e fundit detajeve të vogla për të qenë gjithçka gati.
Dje në mbrëmje janë testuar edhe shatërvanët e shumtë, si dhe ndriçimi i godinave rreth e qark sheshit dhe të vet sheshit. Fotot e publikuara nga Top Channel, tregojnë një pamje fantastike të qendrës.
Sheshi është shtruar me gurë natyralë në formën e pllakave të gurit me trashësi 10-12 cm dhe që janë marrë nga të gjitha trojet e Shqipërisë, duke nisur nga Tropoja dhe Kukësi, Bilishti, Librazhdi, gëlqerorët e Tiranës, Korçës, Gjirokastrës, Sarandës, Berati, Vlorës, Krujës, Bulqizës, Prizrenit, Ersekës, Skraparit etj.
E gjithë sipërfaqja e shtruar me këto gurë arrin në rreth 41 mijë m2 sipërfaqe sheshe dhe trotuare.
