Për profesorin Tritan Kalo, testimet në masë për COVID-19, nuk janë efektive.
I ftuar në “Real Story” Kalo u shpreh kundër testimeve të përgjithshme të popullsisë, ndërsa theksoi se në Tiranë janë evidentuar disa zona ku ka më shumë të prekur dhe ku do të bëhen testime më shumë, duke ndjekur të njëjtën strategji njësoj si në Krujë.
Megjithatë Kalo nuk dha detaje se cilat ishin zonat e prekura në kryeqytet.
“Në Tiranë janë piketuar dy-tre zona ku ka më shumë të prekur dhe do të bëhen testime, nuk mund t’i përmend me emra zonat, nuk mund të them edhe numrin e testeve pasi e ka në kompetencë ISHP. Pra sic u bë me fasonerinë në Krujë ku u testuan të gjithë punonjësit dhe u mbyll”, tha Kalo.
Mjeku u shpreh se testet imunologjike nuk janë ende të standardizuara plotësisht.
“Anglia porositi mbi 2 milionë teste dhe i hodhi të gjitha në kosh. Ky është problemi dhe ka nisur që dje një studim, nëse duhet të shtrijmë testin në popullatë për të parë ku jemi. Akoma jemi në një dilemë të madhe, sepse edhe vetë sëmundja është ende në lulëzim e sipër dhe shumë elementë të saj nuk janë zbuluar ende plotësisht”.
Kalo foli edhe për një valë të dytë infektimesh, që do të jetë më e madhe se e para:
“Infektimet e valës së dytë mund të jenë më të mëdha se të valës së parë, por mund të përballohen me strukturat spitalore, nëse kemi hapje graduale”.
/Iconstyle.al
