Kur një ngjarje tragjike prek një vend e gjithë bota është e përfshirë. Kështu ndodhi sot pas katër sulmeve terroriste që tronditën Brukselin në orët e para të mëngjesit të së martës, dy prej të cilëve të verifikuar në aeroportin Zaventem, ndërsa dy të tjerët në dy stacione metroje në zemër të kryeqytetit belg.
Motivet e shpërthimeve nuk dihen ende, ndërkohë që burime zyrtare flasin për të paktën 34 viktima, 14 prej të cilëve kanë humbur jetën në aeroport dhe 20 në stacionet e metrove. Gjithashtu, flitet për rreth 130 të plagosur. Shpërthimet vijnë katër ditë nga kapja në Bruksel të Salah Abdeslam, i dyshuari kryesor i sulmeve të nëntorit në Paris.
Pas ngjarjes së rëndë pezulluar të gjitha shërbimet hekurudhore që të çojnë tek kompleksi dhe fluturimet. Një nga shpërthimet ka ndodhur pranë check-in-it të American Airlines, ndërsa tjetri u verifikua rreth një orë më vonë në stacionin e metrosë Maalbeek, fare pranë selisë së Komisionit Europian.
Situata ka futur në kaos kryeqytetin belg, atje ku ndodhen institucionet kryesore të Bashkimit Europian, ndërsa janë shpallur tre ditë zie kombëtare për viktimat. Pas ngjarjes së rëndë personalitete nga të gjitha fushat u bënë palë me familjet e viktimave dhe me qytetin belg. Ashtu si politika, edhe bota e modës dhe shtëpitë më të mëdha shprehën ngushëllimet e tyre për ngjarjen tragjike. “Mendimet tona janë me Brukselin”, “Lutje për Brukselin”, “Shprehim ngushëllimet më të mëdha për qytetarët e Belgjikës”, ishin disa nga shprehjet që ndanë modelë dhe markat më të mëdha të modës me fansat e tyre.
