Të paktën dy persona u plagosën sonte në Mynih kur një grua i sulmoi me thikë dhe më vonë u qëllua dhe u plagos për vdekje nga policia.
Gruaja 30-vjeçare, banore e Mynihut me shtetësi bullgare, sulmoi në orën 20:45 fillimisht një burrë 56-vjeçar dhe më pas një grua 25-vjeçare, të cilët po ecnin në zonën përreth Theresienwiese, vendi ku mbahet Oktoberfest çdo vjeshtë. Oficerët e policisë në patrullë e qëlluan atë dhe gruaja iu nënshtrua një ndërhyrjeje kirurgjikale urgjente pak kohë më vonë, por ndërroi jetë nga plagët e marra.
Policia ka rrethuar zonën dhe po heton, por sipas një deklarate, nuk ka më rrezik për qytetarët, ndërsa motivi mbetet i paqartë. Sipas BILD, gruaja 30-vjeçare vuante nga sëmundje mendore dhe ende nuk ka informacion mbi gjendjen e të plagosurve apo numrin e saktë të tyre.
“Vdekja e gruas është e trishtueshme, por për fat të keq ndoshta e pashmangshme”, tha për gazetën Ministri i Brendshëm i Bavarisë, Joachim Herrmann.
