Një tërmet ka lëkundur Tiranën këtë mbrëmje të hëne, duke krijuar panik te qytetarët, tani që askush nuk mund të dalë jashtë për shkak të karantinës.
Qendra Evropiane e Tërmeteve raporton se lëkundja ka qenë me magnitudë 3.3 të shkallës Rihter, dhe është ndjerë fuqishëm nga banorët e kryeqytetit.
Epiqendra e tërmetit ka qenë në afërsi të Shijakut dhe me një thellësi prej 8 kilometrash. Lëkundjet janë ndjerë rreth orës 22:15.
Tani që e gjithë Shqipëria është në karantinë, dhe lëvizjet janë kufizuar në maksimum, lëkundjet bëhen edhe më të lehta për t’u ndjerë nga banorët, të cilët ende janë të tronditur nga tërmeti i 26 nëntorit.
