Një tërmet me magnitudë 4.9 ballë të shkallës Rihter është regjistruar mbrëmjen e kësaj të marte në territorin e Republikës së Maqedonisë së Veriut, duke shkaktuar lëkundje që janë ndjerë në disa zona të rajonit, fatmiresisht pa asnje lendim ne njerez dhe deme te medha.
Sipas mediave të shtetit fqinj dhe të dhënave paraprake nga shërbimet sizmologjike, epiqendra e tërmetit është lokalizuar në zonën ndërmjet Prizrenit dhe Tetovës, në koordinatat 42.137 gradë gjerësi veriore dhe 20.998 gradë gjatësi lindore. Lëkundja është regjistruar në një thellësi prej rreth 5 kilometrash, çka e ka bërë atë të ndihet më fort në sipërfaqe.
Banorë të zonave pranë epiqendrës raportojnë se lëkundja ishte e shkurtër, por e ndjeshme, duke shkaktuar shqetësim të momentit. Tërmeti është ndjerë gjithashtu në disa qytete të Kosovës, si dhe në rajonet përreth, pa shkaktuar panik të madh te qytetarët qe e ndjene shume.
Deri në këto momente, autoritetet nuk kanë raportuar për persona të lënduar apo dëme materiale. Strukturat përgjegjëse vijojnë monitorimin e situatës dhe mbledhjen e informacioneve shtesë për të vlerësuar çdo pasojë të mundshme.
Ekspertët sizmologë theksojnë se lëkundje të tilla janë pjesë e aktivitetit natyror sizmik të rajonit dhe këshillojnë qytetarët të ruajnë qetësinë, duke ndjekur udhëzimet zyrtare në raste të ngjashme.
