Një tërmet me magnitudë 6.8 shkallë Rihter tronditi pjesën lindore të Kubës të dielën, duke e rënduar situatën për popullsinë kubaneze pas javësh të përballura me sfida nga uraganet dhe ndërprerjet e energjisë që kanë paralizuar jetën në ishull.
Epiqendra e tërmetit u lokalizua nga Shërbimi Gjeologjik i Shteteve të Bashkuara rreth 40 km në jug të Bartolomé Masó, dhe dridhjet u ndjenë në të gjithë zonën lindore të vendit, përfshirë qytetin e Santiago de Cuba, i dyti më i madh në vend. Tërmeti, i cili ndodhi në orën 11:49 të mesditës, ishte paraprirë nga një lëkundje me magnitudë 5.9.
Nuk raportohen viktima apo dëme të mëdha, megjithatë autoritetet paralajmëruan për një rrezik të mundshëm tsunami. Në Santiago de Cuba, qytetarët përjetuan momente paniku, teksa njerëzit dolën në rrugë dhe qëndruan të shqetësuar jashtë banesave. Yolanda Tabío, 76-vjeçare, përmendi se kishte ndjerë disa lëkundje të mëvonshme dhe se qyteti ishte përfshirë nga frika. “Gjithçka po lëvizte – muret, gjithçka,” tha ajo për Associated Press.
Kuba ndodhet tashmë në një periudhë të vështirë, pas goditjes së Uraganit Rafael të kategorisë 3, i cili përfshiu pjesën perëndimore të vendit javën e kaluar me erëra të fuqishme, duke shkaktuar ndërprerje të energjisë në nivel kombëtar dhe dëme të mëdha.
Shumë zona ende vuajnë mungesën e energjisë elektrike dhe kushtet e vështira të jetesës kanë shkaktuar protesta të shumta në vend.
