Një 50-vjeçar nga Fieri është arrestuar pasi u filmua teksa tërhiqte zvarrë një qen në pjesën e pasme të makinës së tij.
Sipas Policisë, burri me iniciale F. S., banues në Hoxharë e Vjetër është arrestuar pas publikimit të një videoje në rrjetet sociale ndërsa tërheq me automjetin tip “Opel Korsa” qenin që për pasojë ka ngordhur.
Ai u procedua penalisht për keqtrajtim të kafshëve.
“Duke marrë shkas nga një video e publikuar në rrjetet sociale, ku në fshatin Seman, një automjet tip “Opel Korsa” tërheq nga pas një kafshë shtëpiake (qen), duke shkaktuar keqtrajtimin e kafshës e cila ka ngordhur, ju sqarojmë se:
Specialistët për Hetimin e Krimeve në Komisariatin e Policisë Fier, identifikuan dhe shoqëruan në ambientet e Policisë, shtetasin F. S., 50 vjeç, banues në Hoxharë e Vjetër, Fier.
Në vijim të veprimeve, u procedua penalisht shtetasi F. S., për veprën penale “Keqtrajtimi i kafshëve” dhe materialet i kaluan Prokurorisë pranë Gjykatës së Shkallës së Parë Fier, për veprime të mëtejshme.
Drejtoria Vendore e Policisë Fier fton qytetarët të denoncojnë në numrin 112 dhe në Komisariatin Dixhital, çdo rast të paligjshmërisë në tërësi, duke iu garantuar anonimatin dhe reagim të shpejtë e të paanshëm”, shkruhej në njoftimin e Policisë.
Gjithashtu, rastet shqetësuese me qentë endacakë që keqtrajtohen dhe lihen në kushte mizerabël nga pushteti vendor sa vijnë e shtohen dhe akoma nuk është marrë asnjë masë konkrete për zgjidhjen e këtij problemi kaq madhor. Pavarësisht se të tilla raste janë dënuar gjithmonë nga shoqëria, vazhdojnë ende të jenë të shumta dhe të bëhen akoma më shqetësuese.
Së fundmi, në rrjet kanë nisur të qarkullojnë disa video në të cilat shihet se si policët bashkiakë marrin qentë zvarrë në lagjet e qytetit dhe i çojnë më pas në spital për t’i vrarë me acid klohridrik ne zemër.
Gjithashtu, këto ditë të gjithë jemi njohur me mënyrën e re të vrasjes së qenve nga personat e pashpirt, që i japin kafshëve ushqim të helmuar dhe i lënë të ngordhin.
