Vetëm disa ditë më parë mbarë opinioni u trondit nga ngjarja e tmerrshme që ndodhi në një fshat të Fierit, ku Rudina Kishta dogji banesën e bashkëjetuesit dhe tentoi të mbyste në lumë dy vajzat e saj të mitura.
Personi që shmangu këtë tragjedi duke shpëtuar dy vajzat nga mbytja, në një prononcim për “Balkanweb” ka treguar se si ndodhi ngjarja e rëndë.
“Heroi”, Ardmir Murataj tregon në këtë rrëfim se nëna po tentonte të mbyste vajzat dhe veten, ndërsa ai dhe një person tjetër u hodhën në lumë për t’i shpëtuar. Njërën prej vajzave 6-vjeçare, ai thotë se e ka nxjerrë nga uji pa ndjenja, dhe i ka bërë frymëmarrje artificiale. Pikërisht në këtë moment 42-vjeçarja ka tentuar t’i mbyste me thonj vajzat e saj.
“Unë isha duke peshkuar në lumë dhe shoh një grua me dy fëmijë që vjen në krahun tjetër të urës matanë. Duke kaluar avash avash u hodh direkt në lumë, njërën vajzë e kishte në krahë dhe tjetrën e kapi për flokësh dhe filloi t’i zhysë. Unë kam shkuar me vrap dhe u zhyta me kokë për të kaluar në krahun matanë, ku thellësia mund të jetë më shumë se tre metra. Kam ecur me not dhe i kam hequr një vajzë nga duart, ndërsa vajzën tjetër e kishte kapur për flokësh dhe ka ikur shumë larg. Kam ardhur me not dhe pashë që vajza ishte e mbytur komplet. I kam bërë frymëmarrje artificiale, pasi e nxora nga uji dhe i shpëtova.
Më pas ka reaguar dhe një peshkatar i komunitetit rom, i cili ka shpëtuar gruan. Pasi doli gruaja donte t’i mbyste fëmijët me thonj. Ne lajmëruam policinë dhe gruaja sërish tentoi t’i mbyste fëmijët dhe në sy të policisë. Jam i lumtur që shpëtova dy engjëj. Nuk e ndiej veten hero, mund ta bënte gjithkush”, ka rrëfyer i riu që shmangu këtë tragjedi.
42-vjeçarja Rudina Kishta ditën e djeshme u paraqit në gjykatë ku pranoi se e kishte djegur ajo banesën e bashkëjetuesit dhe vajzat donte t’i vriste që të mos vuanin, pasi jetonin në kushte të vështira. Gjykata e Rrethit të Fierit caktoi ndaj saj masën e sigurisë “arrest me burg”.
Burimi: Balkanweb
