Një ndër fenomenet më të përhapur në botë, është ai i bullizimit. Vitet e fundit është vënë re se edhe në shkollat shqiptare ka një rritje të madhe.
Sonte në programin “Dua të të bëj të lumtur” u trajtua historia e Paolës, vajzës nga Lezha, e cila për vite të tëra ishte dhunuar psikologjikisht nga shoqëria e saj.
Mamaja e Paolës, Liljana, kishte ardhur në studio dhe aty rrëfeu historinë e jetës së tyre. Liljana shumë vite më parë ishte njohur me babain e Paolës dhe kishte vendosur që të martohej me të. Mirëpo disa kohë më vonë, marrëdhënia mes tyre nuk po shkonte siç duhej dhe sh-bashkëshorti i saj kishte filluar të ushtronte dhunë fizike mbi të. Liljana tregoi se kjo ishte dhe arsyeja pse ajo kishte vendosur të divorcohej.
Gjendja e vështirë ekonomike, mënyra e jetesës, puna që bënte Liljana, ndarja nga jeta e babait, ishin disa nga arsyet që miqtë e saj për vite të tëra t’a bullizonin. Sipas Liljanës, Paola kishte menduar që të lëndonte veten.
Për këtë arsye Liljana kishte zgjedhur programin “Dua të të bëj të lumtur” që t’i tregonte Paolës që ajo nuk është e vetme në këtë rrugëtim.
“Dua që të bëhesh e fortë dhe të mos dëgjosh se çfarë të thonë të tjerët. Unë jam këtu për ty e do jem gjithmonë duke të mbështetur! Prandaj mos u mërzit më”,- ishte mesazhi i Liljanës për vajzën e saj.
Nga ana tjetër, Paola rrëfeu vështirësitë dhe pengesat që ishte detyruar të kalonte:
“Kam rënë pre e bullizmit shumë e vogël dhe u lëndova shumë. Më lëndonin, më përbuznin për fatkeqësitë që më kishin ndodhur në jetë. Pavarësisht përpjekjeve të mia që ata të ndalonin, kjo gjë nuk ndodhi kurrë. Jeta më dukej e kotë, sepse askush nuk po më përkrahte, aq sa arrita të mendoja vetvrasjen.”
E ftuara surprizë ishte këngëtarja Mariza Ikonomi. Ajo i dha Paolës një mesazh duke e lidhur me historinë e saj:
“Ne në jetë zhgënjehemi nga shumë njerëz, por kurrë mos e humb besimin në vetvete. Teksa dëgjoja historinë tënde m’u kujtua vetja ime, sepse dhe në fillimet e mija njerëzit më paragjykonin për zërin, por sot e shoh si një veçanti, prandaj kurrë mos hiq dorë!”
