Një incident i rëndë ushtarak është raportuar këtë të premte, pasi Irani pretendon se ka rrëzuar një avion luftarak amerikan mbi territorin e tij, duke rritur ndjeshëm tensionet mes dy vendeve.
Lajmi u bë publik fillimisht nga agjencia shtetërore iraniane e lajmeve “Tasnim”, e cila raportoi se bëhej fjalë për një avion të tipit F-35 dhe publikoi edhe disa foto nga vendi i ngjarjes. Megjithatë, analistët e cituar nga CNN kanë hedhur dyshime mbi këtë pretendim, duke sugjeruar se, bazuar në pamjet e publikuara, avioni i rrëzuar mund të jetë në fakt një F-15.
Sipas burimeve amerikane, fati i ekuipazhit mbetet ende i paqartë. Zyrtarët në SHBA kanë nisur menjëherë përgatitjet për një operacion kërkim-shpëtimi, me qëllim gjetjen e pilotit ose anëtarëve të mundshëm të ekuipazhit përpara se ata të bien në duart e autoriteteve iraniane.
Nga ana tjetër, mediat iraniane raportojnë se përpjekjet amerikane për të lokalizuar pilotin kanë qenë të pasuksesshme deri më tani. Sipas të njëjtave burime, autoritetet lokale kanë shpallur edhe një shpërblim të konsiderueshëm për këdo që arrin të gjejë dhe të kapë të mbijetuarit e mundshëm.
Ngjarja vjen në një moment tensionesh të larta mes Iranit dhe Shteteve të Bashkuara, duke shtuar pasigurinë mbi zhvillimet e mëtejshme në rajon. Deri më tani, nuk ka një konfirmim të plotë dhe të pavarur mbi detajet e incidentit, ndërsa pritet një reagim më i detajuar nga autoritetet zyrtare të të dyja vendeve.
