Jo më larg se dje u konfirmua se gazetarja e “Top Channel” Juli Krisafi do të braktisë televizionin, për t’u zhvendosur në televizionin e ri “A2″ i njohur ndryshe si “CNN” shqiptar.
Moderatorja e njohur e emisionit të pasdites ka punuar në “Top Channel” prej vitesh, fillimisht si spikere lajmesh dhe së fundmi si moderatore e emisionit të pasdites.
Por me sa duket karriera e saj do të marrë një tjetër drejtim, ndërsa presim të njihemi me pozicionin e saj të ri në këtë televizion. Së bashku me Julin, në këtë ekran televiziv do të shkojë edhe gazetari tjetër i njohur i “Top Medias”, Endri Xhafo.
Por transferimet e figurave të njohura të mediave shqiptare drejt “CNN” nuk mbyllen këtu, pasi burime për “iconstyle.al” kanë konfirmuar disa lëvizje të tjera.
Bëhet fjalë për gazetaren e “News 24”, Marsela Karapanço e cila është parë në ambientet e këtij televizioni.
Ajo ka qenë pjesë e “News 24” prej 7 vitesh dhe pak ditë më parë paralajmëroi largimin nga ky ekran për të nisur një sërë projektesh të reja.
Pjesë e “CNN” do të jetë edhe Anduena Llabani, gazetarja e njohur e kronikës e cila pak ditë më parë publikoi foto nga studioja e re e televizionit, ku do të mbajë sërish të njëjtin pozicion.
“A2”, kanali më i ri televiziv i lajmeve ka partneritet ekskluziv me “CNN” dhe do të operojë mbi bazën e ekspertizës së tij.
