Një ngjarje e pazakontë dhe tronditëse ka goditur botën e televizionit amerikan. Aaron Goodwin, një nga figurat kryesore të emisionit të famshëm “Ghost Adventures”, ka përjetuar një nga momentet më dramatike të jetës së tij gjatë xhirimeve të një episodi të ri. Teksa po përgatiste pajisjet në një ndërtesë që thuhej se ishte e përhumbur, ai mori një telefonatë nga policia që do t’i ndryshonte jetën përgjithmonë.
“Isha në mes të xhirimeve kur mora lajmin… policia ishte në shtëpinë time,” – tregoi Goodwin i tronditur. Pak më vonë, produksioni konfirmoi se pjesa e atij momenti nuk do të transmetohej, për shkak të ngarkesës emocionale. Gjatë asaj telefonate, aktori mësoi se bashkëshortja e tij, Victoria Goodwin, ishte arrestuar për komplot në porositjen e vrasjes së tij.
Sipas raportimeve, Victoria ishte vënë në pranga në mars, pasi kishte planifikuar të paguante 11,500 dollarë një të burgosuri në Florida për të ekzekutuar bashkëshortin e saj. Ajo kishte shkruar mesazhe ku pranon se nuk donte divorc, por “fundin e ekzistencës së tij”. Komploti u zbulua kur gardianët konfiskuan telefonin kontrabandë të të burgosurit.
Vetëm disa ditë pas arrestimit të saj, Goodwin paraqiti kërkesën për divorc, duke deklaruar se “nuk ekziston asnjë mundësi pajtimi”. Në një reagim në rrjetet sociale, ai u shpreh se nuk do ta shikojë kurrë episodin e asaj nate tragjike.
“Nuk dua ta përjetoj sërish atë moment dhe atë telefonatë,” – shkroi ai, duke e cilësuar ngjarjen si “të çmendur dhe tronditëse”.
