Reperi Sean “Diddy” Combs po përballet me një tjetër padi për sulm seksual, i teti në një seri të ngritur kundër tij që nga nëntori 2023.
Adria English, një ish-aktore e filmave për të rritur, pretendon se Combs e ka detyruar të kryejë marrëdhënie seksuale me të ftuarit në festat që ai organizonte, si dhe e ka bërë të konsumojë alkool dhe ekstazi.
Combs i ka mohuar akuzat. Avokati i tij Jonathan Davis tha në një deklaratë:
“Pavarësisht se sa padi janë ngritur, nuk do të ndryshojë fakti që z. Combs kurrë nuk ka sulmuar seksualisht apo trafikuar askënd. Ne jetojmë në një botë ku çdokush mund të ngrejë një padi për çfarëdo arsye dhe pa asnjë provë. Për fat të mirë, ekziston një proces gjyqësor i drejtë dhe i paanshëm për të gjetur të vërtetën dhe zoti Combs është i bindur se do të mbizotërojë ndaj këtyre dhe pretendimeve të tjera të pabaza në gjykatë.”
Ajo pohon se ishte e punësuar për të marrë pjesë në një nga “festat” e Combs në vitin 2004, një ngjarje që nuk kishte “asnjë qëllim të keq apo kërkesa për kontakt fizik seksual”, kështu që pranoi ftesa për festa të tjera.
Por në ngjarjen e tretë, Combs dyshohet se i kërkoi asaj të bënte seks me të ftuarit, “pasi ata kishin mësuar për të kaluarën e saj në fushën e videove për të rriturit”.
Një sërë akuzash të tjera për sulme seksuale janë bërë kundër Combs, duke filluar nga nëntori kur ish e dashura e tij, këngëtarja R&B Cassie, e akuzoi atë për përdhunim dhe abuzim fizik. Kjo padi u zgjidh të nesërmen, megjithëse Combs u detyrua të kërkonte falje pasi pamjet e tij duke sulmuar fizikisht Cassie në 2016 u zbuluan në maj.
Joi Dickerson-Neal, Rodney Jones Jr, April Lampros dhe Crystal McKinney kanë ngritur secila padi duke pretenduar sulme seksuale. Combs i ka mohuar të gjitha këto akuza.
