Qeveria ka në plan që të zhvendosë Teatrin Kombëtar, edhe pse kundër dëshirës së artistëve dhe qytetarëve.
Aktori i mirënjohur i skenës dhe i teatrit, Robert Ndrenika mbajti një fjalim dy ditë më parë, ku shprehej kundër planeve të ministrisë për këtë vendim.
“Është folur që do të bëhet një teatër dhe prapë nuk ka patur pikë transparence. Teatri bëhet një herë në 500 vjet. I takon shtetit shqiptar të ndërtojë një teatër, një teatër 500-600 vjeçar. “Turbina” ishte qesharake. Për teatër ajo nuk bën. Ajo është për ndonjë fushatë elektorale. Ne nuk duhet të lejojmë të prishet ai teatër pa marrë vesh se çdo bëhet në të”, u shpreh Ndrenika.
Ndërsa aktori Arben Derhemi u shpreh për arsyen e zhvendosjes për “Top Channel” kështu:
“Motivi i vetëm, që nuk e tregojnë, ështe se Teatrin duan ta bëjnë pallat”.
Pas reagimit të Ndrenikës, një ditë më pas erdhi edhe reagimi i ministres, Mirela Kumbaro, e cila ndryshe nga sa janë shprehur artistët, tha se ka pasur bisedime mes tyre për këtë vendim.
“Jam e gatshme t’i takoj artistët shprehet ajo. Ne jemi duke ndërmarrë një nismë ligjore, që vjen si pasojë e kërkesave jo vetëm të artistëve, por edhe të institucioneve kulturore, qendrore, por edhe vendore siç është Teatri i Korçës. Projektligjin e kemi nxjerrë për konsultim publik në faqen e Ministrisë së Kulturës, e kemi dërguar me email tek të gjithë aktoret dhe grupet e interesit”, u shpreh ajo.
“Po mbarojnë punimet në qendrën e artit e pagëzuar me emrin “Turbina”. Salla aktuale e teatrit do të vazhdojë të jetë funksionale edhe për trupën e teatrit edhe për trupa të tjera. Teatri Kombëtar do vazhdojë të jetë në funksion deri ditën që do të na vijë projekti, por trupa e tij do të zhvendoset në një mjedis shumë komod dhe në këtë gjë e kemi dakordësuar më herët me artistet”, ka shpjeguar ministrja.
Përsa i përket reagimit të aktorit Robert Ndrenika ajo u përgjigj: “Duhet të flas me të”.
