Jam 27 vjeçe dhe kam pasur tre lidhje. Më në fund mund të them se kam gjetur dikë që më pëlqen dhe nuk dua ta humbas. Është i zgjuar, i ëmbël dhe simpatik, e shoh që përpiqet të më bëjë të lumtur, por nuk ia arrin dot në shtrat. Më ka thënë që ka pasur shumë eksperienca me femrat, por mua nuk po arrin të më kënaqë dot. Nga ana tjetër unë po shtirem në shtrat, që ai të mos kuptojë gjë. A duhet t’i them gjë, të jem e sinqertë apo duhet ta gjej fajin te vetja?
Përshëndetje e dashur lexuese! E kuptoj që jeni e dyzuar. Nga njëra anë, më thoni që “keni gjetur” një partner që ju pëlqen për arsyet që i keni tashmë të qarta, por nga ana tjetër, thoni se jeni e pakënaqur seksualisht. Që një marrëdhënie të funksionojë në mënyrë të shëndetshme, për të dyja palët, duhet të ketë jo vetëm pëlqim të ndërsjelltë, por edhe komunikim të hapur për çështjet e rëndësishme. Njëra prej këtyre çështjeve është seksi. Në shoqërinë tonë ka shumë tabu rreth seksit dhe kjo i pengon shumë çifte të flasin hapur. Rezultati: shumë njerëz janë të frustruar për shkak të vështirësisë për të përjetuar kënaqësi seksuale.
Disa njerëz fajësojnë veten dhe kjo ua bën të vështirë ose të pamundur hapjen me partnerin. Po ju, përse e fajësoni veten? A ka diçka që ju ka ndodhur në jetë, që ju ka shkaktuar ndjenja faji? Reflektoni lidhur me këtë për të identifikuar atë që ju pengon. Mirëpo, hapi tjetër është komunikimi me partnerin. Zgjidhja e këtij problemi fillon kur ju të flisni me të, për t’i treguar sesi ndiheni dhe çfarë prisni prej tij.
Pavarësisht se ai mund të ketë pasur shumë përvoja, ju jeni unike dhe keni nevojat tuaja. Nëse nuk komunikoni, vështirësia ose problemi mbetet pezull, i pazgjidhur. Duke heshtur, nuk ndihmoni as veten dhe as partnerin, i cili deri më tani nuk di asgjë për mënyrën sesi ju ndiheni. Ju përshëndes!
*Lediona Braho, psikologe klinike
Për Iconstyle.al
