Shoqata e Bareve dhe Restoranteve i ka dërguar një letër kryeministrit Edi Rama dhe ministres së Shëndetësisë, Ogerta Manastirliu, ku i kërkojnë ndërmarrjen e një iniciative të veçantë ligjore për lehtësimin financiar në këtë periudhë të vështirë.
Si një ndër sektorët me të goditur nga kriza e pandemisë së koronavirusit, shoqata pjesë e së cilës janë 100 subjekte, thekson në letër se në këto kushte që janë, 50% deri në 70% të subjekteve nuk do të mund të rihapen dot. Madje ato që do të ushtrojnë aktivitetin nga 18 maji, do të duan 18 muaj që situata të shkojë në normalitet.
Qeveria ka parashikuar hapjen e restoranteve dhe bareve pas 18 majit, por një shqetësim për pronarët e bizneseve të këtij sektori është edhe kufizimi i orarit, pas rihapjes ata do të qëndrojnë të hapur deri më orën 17:30. Për këtë ata kërkojnë shtyrjen e orarit deri në 1:00 pas mesnate.
Më tej kërkohet ulja e TVSH-së në të njëjtin nivel si sektori i turizmit dhe agroturizmit si dhe subvencionimin e normave të interesit për kreditë aktuale që ka biznesi.
Shoqata e bareve, restoranteve dhe club-eve deri më tani e ka ngritur disa herë zërin, dhe do të ketë edhe një takim me Ministrinë e Financave dhe Ekonomisë për të negociuar kërkesat.
Iconstyle.al ka qenë një ndër mediat që ka ngritur vazhdimisht problematikën e këtij sektori, i cili vetëm në Tiranë mund të mbyllë 30-50% të këtyre bizneseve pasi nuk do të mbulojnë dot shpenzimet.
Ndonëse gjatë kësaj periudhe të vështirë pronarët janë përpjekur të mos largojnë nga puna të punësuarit, sidomos ata që kanë vite dhe janë familjarizuar, ata në rast se s’do të ketë mbështetje për këtë sektor do jenë të detyruar të bejnë shkurtime.
Në letër parashtrohen këto kërkesa drejtuar qeverisë:
Së pari, kërkojmë që të parashikohen grante për subvencionimin e zërit të qirasë si një zë shumë i rëndësishëm në shpenzimet tona dhe përgjatë gjithë kësaj periudhe që kemi qenë të mbyllur, ky zë ka qenë humbje direkte. Është e pamundur që kjo çështje të zgjidhet gjithmonë me mirëkuptim mes nesh dhe qiradhënësve për aq kohë sa shumë nga këta të fundit e kanë të ardhur të rëndësishme dhe shpeshherë sendin objekt qiraje e kanë të blerë me kredi në bankat e nivelit të dytë ku këstet e qirave janë këste kredie.
Gjithashtu kërkojmë subvencionimin e plotë të pagesës së tarifës për përdorimin e veprave audiovizuale të ritransmetuara në publik sipas kërkesave të nenit 140, të ligjit nr. 35/2016 “Për të drejtën e autorit dhe të drejtat e tjera të lidhura me të” për gjithë vitin 2020.
Po ashtu, kërkojmë që përjashtimi i pagesës së shfrytëzimit të tarifës së zënies së hapësirës publike të mos jetë vetëm për muajt mars dhe prill 2020, por të vijojë edhe më tej, të paktën për një periudhë 18 mujore deri në rimëkëmbjen totale të aktiviteteve tona. Këtë kërkesë e bazojmë edhe në faktin që pas rihapjes, për shkak të protokolleve që do të caktohen apo dhe për vetë faktin se do vijojë distancimi social, hapësirat publike që do të zihen do të jenë më të mëdha, pikërisht për të mbrojtur qytetarët nga infektimi. Për shkak të situatës kërkojmë që përkohësisht të përjashtohemi edhe nga taksa e reklamës, taksa e përkohshme për infrastrukturën arsimore, taksa e tabelës informuese si dhe tarifa e pastrimit.
Gjithashtu, specifikisht për lokalet e natës, të cilat do të jenë të fundit që do të rihapen, por dhe që do të kenë funksionalitet të plotë më vonë se të gjithë subjektet e tjera, kërkojmë që mënyra e subvencionimit të jetë e ndryshme dhe më gjithëpërfshirëse, këtu duke marrë parasysh edhe faktin që numri i këtyre subjekteve është i vogël.
Së dyti, kërkojmë subvencionimin e normave të interesit për kreditë aktuale që kemi të lidhura me biznesin, dhe subvencionim të normave të interesit në kredi disa qëllimore në lidhje me rimëkëmbjen e biznesit tonë dhe jo vetëm sa i përket pagave të punëmarrësve, por që të kemi mundësi që ta aplikojmë si një instrument për të rritur kapitalin qarkullues, në mënyre që të mos shkojmë drejt falimentimit, por të kemi mundësi te rimëkëmbemi.
Së treti, kërkojmë uljen e TVSH-së në të njëjtin nivel si sektori i turizmit dhe agroturizmit si një instrument i rëndësishme për të incentivuar vijimin e aktivitetit në të njëjtin kapacitet si më parë si një faktor kyç edhe për zhvillimin ekonomik të vendit.
Së katërti, kërkojmë që këstet e parapagimit të tatim-fitimit edhe për tatimpaguesit me qarkullim mbi 14,000,000 (katërmbëdhjetë milionë) lekë që ushtrojnë aktivitet në fushën e bareve dhe restoranteve, për vitin 2020 të mos paguhen.
Së pesti, kërkojmë që të vihemi në dijeni në lidhje me datën e rihapjes së subjekteve që ushtrojnë aktivitetin e bareve dhe restoranteve pasi data tashmë janë programuar edhe në vende si Italia apo SHBA që kanë kaluar një situatë shumë më të vështirë shëndetësore edhe se vendi ynë. Përcaktimi i datës paraprakisht, na lehtëson buxhetimin në lidhje me shpenzimet që i kemi fikse edhe gjatë periudhës së mbylljes së aktivitetit, shpenzime të tipit qira, sigurime shëndetësore dhe shoqërore apo dhe me stokun që kemi i cili ka skaduar apo është drejt skadimit.
Së gjashti, kërkojmë të rishikohet orari i mbylljes së aktivitetit i cili duhet të shtyhet deri në ora 01:00. Kjo pasi në kuadër të masave të distancimit social, veprimtaria jonë do të jetë e kufizuar në hapësirë, por në këtë mënyrë do mund ta rikuperojmë humbjen duke u shtrirë më gjatë në kohë. Për këtë arsye, vlerësojmë se rishikimi i orarit, duke marrë përsipër të respektojmë të gjitha parashikimet për ruajtjen e qetësisë publike, është jo vetëm i rëndësishëm në një plan afatgjatë, por edhe një masë inkurajuese për të kompensuar pasojat që po na vijnë në kuadër të kësaj pandemie.
