Sot rreth orës 13:00, në lagjen nr.1 të Durrësit, janë regjistruar disa të shtëna armësh. Bëhet e ditur se situata e pasuar në një sherr me armë ka ndodhur në ambientet e lokalit të Noizyt, në zonën e Currilave.
Mësohet se i plagosur nga të shtënat ka mbetur 31 vjeçari, Ardit Kërtusha ish-kandidati për kreun e PS në Durrës.
Shtetasi Ardit Kërtusha ka mbetur i plagosur në këmbë gjatë konfliktit.
Sipas policisë, dyshohet se ngjarja ka ndodhur gjatë një konflikti për motive të dobëta.
Për momentin, Kërtusha ndodhet në spital nën kujdesin e mjekëve, jashtë rrezikut për jetën.
Nuk dihet ende asnjë informacion në lidhje me shkaqet e nisjes së sherrit apo se kush është autori i të shtënave me armë.
Njoftimi paraprak i policisë:
Durrës/Informacion paraprak
Rreth orës 13:00, në lagjen nr.1 Durrës, dyshohet se gjatë një konflikti të çastit, për motive të dobëta, është plagosur me armë zjarri, në këmbë, shtetasi A. K., 31 vjeç, i cili ndodhet nën kujdesin e mjekëve, jashtë rrezikut për jetën.
Vijon krehja e zonës, për identifikimin dhe kapjen e autorit.
Grupi hetimor ndodhet në vendngjarje dhe po punon për sqarimin e plotë të rrethanave të ngjarjes.
Ardit Kërtusha është pjesë e PS që prej shumë vitesh. Përplasja mes tij dhe drejtuesve socialistëve në Durrës nisi në tetor të vitit 2019, kur ai shprehu dëshirën për të kandiduar si kryetar i PS.
Kërtusha ka akuzuar se është kërcënuar dhe larguar padrejtësisht nga detyra në OSHEE, hakmarrje kjo pasi ka kërkuar të kandidonte pa pëlqimin e gardës së vjetër të PS në Durrës.
