Meksika po përjeton tensione të forta pas raportimeve për vrasjen e Nemesio Rubén Oseguera Cervantes, i njohur si “El Mencho”, kreu i kartelit të fuqishëm Jalisco Nueva Generación. Situata e trazuar nuk ka kursyer as sportin, ndërsa vendi përgatitet të presë Kupën e Botës pas më pak se katër muajsh, si bashkëorganizator me Shtetet e Bashkuara dhe Kanadanë.
Dhuna u reflektua edhe në fushën e blertë, ku një ndeshje e kampionatit të futbollit të femrave u ndërpre për shkak të të shtënave me armë që u dëgjuan jashtë stadiumit. Bëhet fjalë për përballjen mes Necaxa dhe Querétaro, e zhvilluar në Stadiumin Victoria.
Sipas informacioneve që po qarkullojnë në rrjetet sociale, në fillim të pjesës së dytë arbitrja ndaloi lojën dhe udhëzoi futbollistet e të dyja skuadrave të largoheshin menjëherë nga fusha. Lojtaret, të frikësuara, u drejtuan me shpejtësi drejt tunelit të stadiumit, ndërsa edhe stafi i arbitrimit u largua, duke lënë topin në mes të fushës.
Pas një ndërprerjeje të shkurtër dhe rikthimit të qetësisë, sfida rifilloi. Në fund, Necaxa arriti të fitojë me rezultatin 2-1.Ngjarja ka ngritur shqetësime serioze për sigurinë publike në Meksikë, veçanërisht në prag të një eventi madhor si Kupa e Botës, ku vendi pritet të jetë në qendër të vëmendjes globale.
