Me hapjen graduale të bizneseve dhe rifillimin e lëvizjeve, turizmi shihet si motori i vetëm për rindezjen e ekonomisë, mirëpo në vendin tonë qeveria nuk ka dhënë një mbështetje të posaçme për aktorët e këtij tregu.
Ndonëse 2020 shihej si një vit me shumë rëndësi për turizmin, që do ta çonte në një shkallë më të lartë, pasi një vit më parë ndërtimet e reja, përshtatja e paketave turistike dhe vlerësimi për Shqipërinë, e kthyen atë në destinacion për 6.4 milionë banorë, pandemia ka vënë në pikëpyetje edhe mbijetesën.
Shoqatat Turistike në vend janë mbledhur dhe kanë nënshkruar një peticion, ku i kërkojnë qeverisë gjashtë kërkesa për kapërcimin e krizës së krijuar nga Covid-19, për turizmin shqiptar, raporton Newsbomb.al.
Në peticionin drejtuar kryeministrit Edi Rama dhe për dijeni ministrive të Turizmit dhe Mjedisit, si edhe të Financave, shoqatat i kërkojnë qeverisë realizimin e 6 kërkesave, ku e para është heqja e të gjitha taksave deri në fund të vitit 2020.
Shoqatat po ashtu kërkojnë subvencionimin e pagave edhe për punonjësit e bizneseve të mëdha turistike të larguar nga puna pas datës 10 prill 2020.
6 kërkesat drejtuar qeverisë:
1-Çlirimin e bizneseve të turizmit nga të gjitha detyrimet fiskale deri në 31 dhjetor 2020 (përfshirë taksat lokale dhe taksën e pronës).
2-Subvencionimin e pagave edhe për punonjësit e bizneseve të mëdha turistike të larguar nga puna pas datës 10 prill 2020.
3-Ngrirjen e kësteve dhe krijimi i kushteve për kreditë të buta për sektorin e akomodimit.
-Propozojmë të shtyhen afatet e pagesave të kredive të paktën deri në 30 mars 2021, qeveria duhet të mbulojë me grante nga BE interesin e stokut të kredive në këtë industri.
-Të rritet kapitali i garancisë sovrane dhe tu krijohet mundësi kreditimi hoteleve nga kjo garanci deri 20% të të ardhurave të realizuara në vitin 2019 me interes zero dhe gres periode deri në 2 vjet në mënyrë që të shpëtojë falimenti.
4-Mbështetje nga qeveria me pagesa të sigurimeve shoqërore të hoteleve që kanë profil sezonal dhe kryesisht ato që nuk kanë biznes të dytë gjatë periudhës së dimirt.
5-Zbritja e TVSH nga 20% në 10 % edhe për hallkat e tjera të turizmit që nuk janë përfshirë në reduktimin e TVSH.
6-Bonus për turistët vendas që do bëjnë pushime në Shqipëri.
