Afro-amerikani George Floyd, i cili u vra në mënyrë mizore nga disa oficerë gjatë një arrestimi, shkaktoi reagime të shumta në rrjetet sociale gjatë verës.
Asokohe edhe shqiptarët, figura publike por jo vetëm u prekën dhe u revoltuan nga kjo ngjarje. Mirëpo, çfarë bënë sot kur një 25-vjeçar shqiptar u vra pabesisht nga policia?
Një reflektim shumë të drejtë ka bërë Donald Veshaj, i cili ka shkruar pak minuta më parë në një status në Instastory:
Black lives matter? Të gjithë shqiptarët në këmbë për një vrasje në Amerikë, postime pa fund. Po për vrasjen e një 25-vjeçari shqiptar të pafajshëm lives matter? Ncncnc turp! Këta jemi ne!
Vrasja e Floyd ngriti në këmbë botën dhe shkaktoi protesta të dhunshme në SHBA, por në vendin tonë kjo ngjarje kaq e rëndë që cënon jetën e çdo qytetari shqiptar po kalon pa marrë vëmendjen dhe vendin e merituar.
Ku janë figurat publike që mbushën Instagramin me foto të zeza në muajin qershor? Pse askush nuk poston foton e Klodian Rashës në Instagram për të ngritur zërin dhe për të nxitur reagim për të drejtën themelore që është jeta?
Nuk është “në modë” apo jo?
Policia shqiptare fatkeqësisht nuk ka qenë asnjëherë në shërbim të qytetarëve, por vetë një lodër në dorë të politikanëve dhe qeverive që ndërrohen.
Përse nuk mban përgjegjësi politike ministri Lleshaj për vrasjen e kryer nga polici i tij? Pse nuk është në burg shefi i komisariatit? SHÇBA, e cila varet direkt nga ministri Sandër Lleshaj, me deklaratat e saj për vrasjen e të riut Klodian Rasha, po kryen veprën penale “veprime që fshehin të vërtetën”.
Është fakt flagrant i krimit policor: Është përdorur arma ndaj një shkelësi që dënohet maksimumi me gjobë 10 mijë lekë! Policia e dënoi me vdekje!
Policia me këtë rast ekstrem është vënë në armiqësi të drejtpërdrejtë me qytetarin që është dhe punëdhënësi i tyre i drejtpërdrejtë. Ky veprim është i pafalshëm dhe padyshim duhet reagim i madh publik.
