Mbrëmjen e djeshme të gjithë flisnin për takimin mes kryeministrit dhe kreut të opozitës, të cilët zhvilluan një takim prej 4 orësh për të gjetur një konsensus për zgjedhjet e ardhshme.
Ndërsa deri më tani mësohet se kryeministri Edi Rama është tërhequr nga mbajtja e zgjedhjeve në 18 qershor, duke ofruar 2 korrikun si datë, ajo që bëri më shumë përshtypjen ditën e djeshme ishte qëndrimi i Ramës dhe i Bashës para dhe pas takimit.
Para nisjes së takimit, në momentin kur Basha po fliste jashtë për median, kryeministri ndoqi për disa sekonda atë çfarë po fliste.
Më pas i është afruar, duke e kapur prej krahu dhe iu drejtua: “O Lul, hajde, se erdha unë, eja lart”. Kjo batutë ka pasur përgjigjen e menjëhershme ta Bashës: “Shko aty, se aty kemi punë, jo këtu”. Kjo u duk si një sinjal që palët mund të arrijnë një marrëveshje.
Pas më shumë se katër orë bisedash, dy liderët pasi dolën nga Kryesia e Kuvendit dhe i shtrënguan duart njëri-tjetrin si një mesazh për arritjen e një marrëveshjeje.
